Shillong, Jymmang 02
Ka shi kol ba la thep da u Niclas Fuellkrug ka la biang pura ïa ka Borussia Dortmund na ka bynta ban pynliem noh ïa ka Paris Saint-Germain da 1-0 kol ha ka semi-final (first leg) jong ka Champions League ha ka step jong ka sngi Palei.
Kane ka kynhun ka la khmih lynti ban wanphai biang sha ka final hadien ba la rung teng ha ka sien kaba nyngkong eh ha u 2013. Ka la lah ban pynpaw ïa ka jingtbit ha-khmat 80,000 ngut ki paidbah nongkyrshan ha la ïing. U Fuellkrug, uba la ïalehkai ha ka sien kaba nyngkong eh ha ka Champions League ha ka rta kaba 31 snem, u la ïoh ïa ka kabu kaba biang eh hadien ka jingïarap pynbuh bol da u Nico Schlotterbeck ha ka minit kaba 36.
U khlur ïalehkai ka PSG u Kylian Mbappe um shym la lah ban pynurlong wat la u la ïoh ïa ar tylli ki kabu ksiar ha ka kylla step.
“Nga sngew ban ong ba ngi la lah ban ïalehkai bha bad ngi da sngewhun halor kane ka rukom ïalehkai,” la pynpaw u rangïalehkai ‘dien kane ka kynhun u Mats Hummels.
Ka Dortmund, kaba la ïakhaid bad shah rem ha ka PSG mynta ka aïom ha ka jingïalehkai group, ka la lah ban ïai bteng na ka bynta ban wanphai biang ha Wembley naduh ba ka la rung sha ka final ha ka Champions League ha ki 11 snem mynshwa.
Wat hapdeng ka jingshah rem, pynban ka PSG ka dangdon jingkyrmen ban khur jingjop ha la ïing ha ka wat kaba ar jong ka semi final ka ban long ha ka 8 tarik mynta u bnai.
“Ka stadium jong ka PSG bad ki paidbah kin ai ka jingkyrshan pura na ka bynta jong ngi ha ka wat kaba ar bad ngi tip ba ngi lah ban ïalehkai bha na ka bynta ban pynurlong sha ka thong,” la ong u kapten ka PSG u Marquinhos.
Ha kawei pat ka liang u manager ka Dortmund u Edin Terzic u la ong ba ka PSG kan sa rah ïa ka nam lahduh ha ka Cham-pions League naduh ba la shimti da ki trai kiba na Qatar naduh ki shphew snem mynshwa.
Haba phai sha kawei pat ka jingïakhun semi final (1st leg) kaba la long ha ka sngi Balang, ka Bayern Munich bad ka Real Madrid ki la ïakhaid mar 2-2 kol. Te kumta kine ki kynhun kin hap ban pynthikna ha ka wat kaba ar ka ban long ha ka 9 tarik mynta u bnai na ka bynta ban ïoh rung sha ka final.
