Shillong, Jymmang 02
Ka jingpyntreikam ïa ka aiñ shna ïing ha ki jaka ba hap hapoh ka jingpeit ka Khasi Hills Autonomous District Council (KHADC) ka la nang ïaid shaphrang namar na ki 527 tylli ki jingpan jingbit, 313 tylli la dep ban ai sha kito kiba pan jingbit ban shna ïing thymmai.
Ïa ka aiñ shna ïing la pyntreikam lyngba ka Khasi Hills Building and Structure Regulatory Authority (KHBSRA) jong ka KHADC.
U Executive Member ka KHADC u Bah Teiborlang Pathaw uba peit ïa kane ka tnat u la ong ba ka Sorkar Jylla ka la pynmih ïa ka jingpynbna ha ka 15 tarik u Ïaïong 2021 ha kaba la pynskhem ïa ki ar tylli ki bor (authority) na ka bynta ban ai jingbit ban tei ïing. Kawei ka dei ka Meghalaya Urban Development Authority (MUDA) kaba peit ïa ki jaka hapoh u pud ka Municipal katba kawei pat ka dei ka Khasi Hills Building and Structure Regulatory Authority (KHBSRA) jong ka KHADC kaba peit ïa ki jaka kiba hap ha Schedule Area.
U Bah Pathaw u la ong ba ha u snem 2022 ka KHADC ka la sdang pyntreikam ïa kane ka aiñ bad ban leit peit ïa ki jaka kiba dei ban leh ïa ki jingtei jingshna ïing bad bud katkum ki kyndon jong ka aiñ.
Kumta ha u snem 2022 la pynmih ïa ka jingpyntip paidbah ban pyntreikam ïa kane ka aiñ namar ka long kaba donkam khamtam namar ka Jylla ka dei kaba hap ha ka ‘Seismic Zone V’ lane ka jaka kaba kham khie khah- khah u jumai.
U la ïathuh ba naduh u snem 2022 haduh mynta u snem 2024, ki la don 527 tylli ki jingpan jingbit bad na kine, 313 tylli ki jingbit la dep ai sha kito kiba pan jingbit ban tei ïing.
U Bah Pathaw u la ong ba ka Executive Committee ka shimkhia ruh ïa kane bad pyrshang ban pynsted ha ka rukom ai jingbit khnang ban nym mad jingeh ki paidbah kiba dei ban ïoh jingbit ban shna ïing.
Une u EM ka KHADC u la ïathuh ba na ka liang ki ophisar ka KHADC ki la leit peit ïa ki jaka ba don ka jingshna ïing namar ka long kaba donkam ban bud ïa ki kyndon kiba la pyntreikam bad bynshet ha ka KHADC ban pyntreikam.
