Shillong, Jymmang 02
Ka phlim ‘Ka Chithi’ kaba long kawei na ki phlim kaba la paw bad ïoh khur ruh ka khusnam shabar na la ka jylla, yn sa pyni paidbah biang naduh ka 7 tarik ha Soso Tham Auditorium, Shillong.
Ïa kane ka phlim yn pyni naduh ka 7 tarik haduh 12 tarik bad yn pyni ïa kane ka phlim haduh lai sien ha ka shisngi, kata ha ka por 2 baje mynsngi, 4:15 janmiet bad 6:30 mynmiet.
Hapoh ka jinglam lynti jong ka Kong Simi Khongtiang, kaba long kawei na ki Director ba tbit bad paw bha, ka phlim ‘Ka Chithi’ ka la dep ban ïoh lypa ka jingithuh bad ka jingïaroh na kylleng. Shwa ban pyni ha nongbah Shillong, kane ka phlim ka la dep ban khur ruh ïa ka khusnam ‘Best Director Award’ ha ka Prag Cine Awards bad ruh ïa kaba la dep ruh ban pyni ha ka Bengaluru International Film Festival bad ha ka North East International Film Festival ha Imphal bad shen yn sa lah ruh ban pyni hapoh ka Habitat International Film Festival ka ban long ha New Delhi.
Ka Kong Simi Khongtiang kaba dei ka Director jong ka phlim ‘Ka Chithi’, ka la buh ka jingkyrpad sha ki paidbah ba kin ai jingkyrshan ïa kane ka phlim da ka ban wan sha ka screening ka ban pynlong ha kitei ki tarik.
Ka Kong Simi ka la ai khublei ruh ïa ka jingai jingkyrshan jong u Myntri ka tnat Arts and Culture, ha kaba ka sorkar ka la shim ïa ki sienjam ban kyrshan ïa ki nongshna phlim ha ka jylla.
Ka la ïaroh ïa ka rai ban pyni ïa katei ka phlim ha Soso Tham Auditorium, ban ithuh ïa ki jingeh bad jingtynjuh jong ki nongshna phlim ha ka jylla ban ïoh ïa ki jaka ban pyni ïa ki phlim ki jong ki.
