Geneva, Jymmang:
Ka United Nations ha kane ka por ka la pynpaw ia ka jingsngewkhia halor ka jingjulor ba ka Israel ka la wanrah ia ka nongbah Gaza ha kine ki hynriew bnai mynta bad ka UN ha kane ka kynti ka la ianujor ia ka thma ha Ukraine bad ka thma ha Gaza da kaba ong ruh ba ka Gaza Strip ka la kham jot bad kham julor shibun shah ban ia ka Ukraine kaba la shah hiar thma ha ka Russia mynta la 2 snem.
Nalor kata, la ong ba ka long kaba eh ban pynkhuid bad pynwandur biang ia ka nongbah Gaza namar ki nongpynkhuid bad nongtrei kin ym iakynduh jingeh tang ha katei ka kam hynrei kin hap ban ioh ring mynsiem ruh ia ki lyer bih kiba mih na kito ki jaka kiba la julor ha ki bom kiba khlaiñ bor jong ka Israel.
Ka tnat United Nations Mine Action Service (UNMAS) ka la buh jingkheiñ antad ruh ba ka jingdon ki lyng-khot-lyngkhai bad ki kynrum-kynram kiba julor na ki iing ki sem bad ki jingtei bapher bapher hapoh Gaza ka la poi kumba 37 Million Ton tad haduh jong une u Iaiong.
Dei hangne ba katei ka tnat ka la pynshisha ba ka Gaza ka la julor bun shah ha ka jingleit hiar thma jong ka Israel lada ianujor bad ka jingjulor jong ka Ukraine ha ka jingiakhun thma bad ka Russia mynta la 2 snem.
Wat la katta, la ong ba ym dei tang katei ka jingjulor ha Gaza kaba la wanrah jingeh ne pynsngew shon jingmut ia ka UNMAS. Hynrei ka jingeh ka long ba kitei ki lyngkhot-lyngkhai bad ki jingjulor baroh ki lah ban don ia ki kynja lyer bih kiba la khleh lang na ki bom bad ki jingdon- jingem kiba long dawai bih bad kiba don ha kitei ki jaka naduh shuwa ka por ban julor. Namar la ong ba kane kan ktah jur ia ki nongtrei bad ia ki nongpynkhuid bad kin hap ban len ia la ka jingim tang ban leit pynkhuid khlem da tip tikna la kan don jingktah ne em ia ka met bad ka koit-ka khiah jong ki hadien-habud.
