Mairang, Jymmang 02
Ka shlem treikam jong ka District Sports Officer (DSO) West Khasi Hills ka la sdang ïa ka lympung ïalehkai ba la tip kum ka 3rd Eastern West Khasi Hills District Level Inter School Athletic Meet 2024 ha ka sngi Palei ha madan KSA kaba ha Mairang.
Ïa kane ka lympung la wan ban plie da ka Sports Officer jong ka tnad ïalehkai jong ka sorkar Jylla, ka Kong Darlene Khonglam ha kaba la ïadon ryngkat lang ka DSO WKH Kong Balarina Syiem, ki Sordar Shnong, ki nongtreikam Sorkar ki khynnah skul bad kiwei kiwei.
Ha kane ka lympung ka ban neh haduh lai sngi lynter la wan ïashim bynta 23 tylli ki skul na kane ka thaiñ bad kumba 822 ngut ki nongïalehkai kynthei bad shynrang kiba shim bynta ha ka kyrdan ïalehkai Under-14, Under-16 bad Under-18.
Ha kane ka sngi sdang ïa kane ka lympung ki don bun jait ki jingïalehkai ïa kaba ki nongïashim bynta na kitei ki skul ki la ïakhun tyngeh kiba kynthup ïa ka jingïakop mareh 100 meter, Shoot-Put , Discuss Throw, High Jump, Long Jump, Javelin Throw bad kiwei kiwei.
Haba ai jingkren ha kane ka sngi, na ka liang ka Sports Officer ka Kong Darlene Khonglam ka la pynpaw ka kmen ban ïohi ïa ki skul kiba la wan ïashim bynta ha kane ka lympung. “Nga pdiang sngewbha ïa baroh ki khynnah kiba la wan ïashim bynta ha kane ka lympung bad nga kyntu ïa phi ba kane ka lympung kam dei tang ba phi ïoh ïa ka met kaba koit ba khiah, hynrei ba phi pyni ïa sap ïalehkai ba phi don.”
“Ïa kane ka lympung ïalehkai Inter School la pynlong ha baroh ki 12 tylli ki district jong ka Jylla na ka bynta ban plie lad ïa ki khynnah ba kin pynpaw ïa la ki sap ïalehkai ba kyrpang jong ki. Ki nongjop ha ki District Level kin shah jied ban mihkhmat sa ha ka State Level ban pynlong shen da ka tnat ïalehkai jong ka Sorkar Jylla,” ka la bynrap.
“Kane ka lympung ka long ka long ban kyntiew ïa ki khynnah ïalehkai khnang ba kin nangjam shaphrang ha ki kam ïalehkai jong ki. Te kumta na ka liang ka tnat ka la ju ai jinghikai ïa ki khynnah hashwa ba kin leit ïashim bynta sha ki lympung ïalehkai shabar jylla kum ka National School Games bad ka Khelo India Youth Games nalor kiwei pat ki lympung kum ka Zonal, East Zone bad kiwei.”
“Phi dei ban sngewthuh ba ka kam ïalehkai bad ka jingpule ki dei ban ïaid lang ryngkat namar ki ïarap ban kyntiew ïa ki jingnang jingtip jong ki khynnah. Te kumta phi dei ban nang ban bate ïa ka por ïalehkai bad ka por ban khreh kot,” ka la bynrap da kaba ai khublei kitbok kitrwiang ruh ïa baroh ki khynnah ba kin ïalehkai bha ha kane ka lympung.
Ïa kane ka lympung yn pynkut ha ka sngi Saitjaiñ (4 tarik) ha kaba u Deputy Commissioner ka Eastern West Khasi Hills un long u kongsan.
