Shillong, Jymmang 02
Ar ngut ki nongkiew lum ka Jylla hapoh ka lama jong ka Meghalaya Sport Climbing and Mountaineering Association (MeSCMA) ki la shah thung na ka bynta ban ïashim bynta ha ka Methods of Instruction (MOI) kaba ha Himalayan Mountaineering Institute, Dar-jeeling naduh 2 haduh 25 tarik mynta u bnai.
Kine ki long u Teimiki Sungoh bad ka Valarie Suchiang na ka shnong Shangpung, West Jaiñtia Hills District. Ïa kane ka jingleit shah hikai la bei tyngka da ka tnat ïalehkai jong ka Sorkar Jylla.
Kat kum ka kyrwoh ba la pyllait da ka President ka Kong Malviancy Shabong la ong ba ka MOI kaba dei ka shlem ai jinghikai ka long kaba eh bha bad kaba kham jynjar ban pynkhreh lypa ïa ki nongshah hikai na ka bynta ban long kum ki nonghikai ha ki prokram kiew lum. Kane ka jinghikai bad ka jingbatai ka kynthup lang ïa ka jingbatai kaba kham bniah, ki buit bad ki jingkilanmet ha ryngkat ka thoh ka pule (theory) na ka bynta ka jingtip kaba kham bniah halor kane ka bynta.
