Raipur, Jymmang:
Ha kaba ïadei bad ka jingpyntreikam ban ïakhun pyrshah ïa ki lehnoh Naxal, ki la don kumba 10 ngut ki dkhot kane kynhun lehnoh kynthup ïa lai ngut ki kynthei kiba la shah pynïap ha ki khappud jong ka Narayanpur bad Kanker distrik ha Chhattisgarh ha ka sngi Ba-ar, la ïathuh ki pulit.
Kumba la ïathuh ki heh pulit, la ong ba ka la don ka jingïasiat kaba markylliang kaba la jia ha ka por 6:00 baje mynstep ha ka khlaw kaba don hapdeng ka shnong Tekmeta bad Kakur ha ka thaiñ Abhujmad ha ka por ba la don ka jingïatreilang jong ka kynhun shipai District Reserve Guard (DRG) bad Special Task Force (STF) ban leit thwet ïa ki dkhot jong ka kynhun lehnoh.
Kane ka dei ka sien kaba ar jong ka jinglah ban pynjem khnap ïa ka kynhun jong ki lehnoh Naxal da ki shipai ïada ri tang ha ki 15 sngi. Hadien ba ka jingïasiat ba markylliang ka la sangeh, ïa ki metïap jong 10 ngut ki Naxal kynthup lai tylli jong ki kynthei, la lap na ka jaka ba la don ka jingïasiat, la ïathuh shuh shuh ki heh pulit.
Haduh ba la thoh ïa ka khubor, ym pat ïoh jingtip ei ei ban batai bniah shaphang kine ki Naxal kiba la shah siat ïap, u la bynrap. La ïoh ban kurup ïa ka suloi AK-47 bad ïa kiwei pat ki tiar siat bad ki tiar pynbthei na ka jaka ba la don ka jingïasiat.
Ka jingleit thwet lehnoh ka dang ïai bteng ha kane ka thaiñ, ïa kaba la shah ñiew ba ka la long ka jaka ba shah ktah jur na ki kam pyntriem jong ki lehnoh. Ki la don baroh kumba 91 ngut ki Naxal kiba la shah pynïap haduh mynta ha kiba bun ki jingïasiat ba markylliang bad ki shipai ïada ri ha ka thaiñ Bastar, la ïathuh u heh pulit.
Ha kawei na ka jingleit thwet lehnoh ba la pynlong da ki shipai ïada ri ha Chhattisgarh, la ong ba ki la don kumba 29 ngut Naxal kiba la shah pynïap bad ïa ki metïap jong ki la ïoh ban tam ha ka 16 tarik, Ïaïong.
Na ki 29 ngut ki lehnoh, ki la don palat 12 ngut ki kynthei kiba ju shna bad pyndait ïa ki tiar siat bad pyrshang ban ai jingïada ïa ki ‘riew rangbah haba ki shah pynibor ha ki shipai.
Ki la don kumba 3 ngut ki shipai ïada ri kiba kynthup ïa 2 ngut ki shipai ka tnat Border Security Force bad uwei jong ka District Reserve Guard (DRG), kiba la mynsaw ha ka por ba la don ka jingïasiat kaba markylliang.
