Shillong, Jymmang 02
Ha kawei ka jingjia, ki pulit ki la ïathuh ba u kpa jong uwei u samla u la ujor ba u khun jong u, u la shah tep im ha kawei ka jaka kaba dei jong ka Dalmia Cement Ltd.
Ki pulit ki la ong ba u Babul Uddin u la ujor ba ha ka 25 tarik Ïaïong, 2024 ha ka por kumba 6:30 janmiet, u khun jong u, u Jakir Hussain, 23 snem ka rta, uba ñiah ïa kawei ka trok (Tipper Truck) kaba don ïa u nombor TR-01X-1553, u la shah tap im ha kawei ka jaka jong ka Dalmia Cement Ltd.
Kane ka jingjia ka la jia na ka daw ba uwei pat u nongñiah ïa ka kali puh shilum lane ‘Excavator’ u dang thep ïa ki maw (Chips) na ka puh shilum sha ka trok ba ñiah utei u samla uba la khlad. La ong ba u nongñiah jong ka puh shilum u la leh torti ha ka rukom treikam.
Hadien katei ka jingjia, la pynkit ïa utei u samla sha Dalmia Cement Pvt. Hospitals, hynrei u doktor uba la peit ïa u, u la pynbna ba utei u samla u la dep khlad lypa.
