Shillong, Jymmang 02
Ka jingshah kawang petrol bomb jong ki thanat, shlem treikam sorkar bad ki kali pulit ka la nang ïai bteng na kawei ka sngi sha kawei pat. Nangta ha ka step synñia jong ka Sngi Palei, ki runar ki la kawang petrol bom sa ïa ka jaka sah ki CRPF kaba don ha jingkieng Mawlai.
Katkum ka khubor pulit, kane ka jingshah kawang petrol bom jong katei ka jaka sah ki CRPF ka la jia ha ka por 12:30 baje eiei shiteng synñia hynrei kam shym la don satia kano-kano ka jingjulor ne mynsaw namar ba une u petrol bom ba la kawang u la hap ha phyllaw kaba dei ka madan khyndew.
Lah ban pynkynmaw ruh ba ha ka step phyrngab jong ka Sngi Balang, ka la don ka jingshah kawang petrol bomb jong ki thanat, kata ha thanat Sadar bad thanat Rynjah bad kawei ka shlem treikam sorkar jong ka Meghalaya Government Contruction Corporation (MGCC) kaba don ha Rilbong.
Namar ka jingbteng jong ka jingshah kawang petrol bom jan man ka sngi, la ïohi ba ka tnat pulit ka la pynkhlaiñ bha ïa ki bor pahara khamtam ha ka por mynmiet ban tehlakam ïa kum kine ki jingjia.
