Khliehriat, Jymmang:
Ka Khasi Students’ Union (KSU), East Jaiñtia Hills District Unit ha ka 1 tarik Jymmang ka la buh da ka jingujor ha u Deputy Commissioner ka East Jaiñtia Hills ban pyrshah ïa ki karkhana pynmih dewbilat halor ka jingbym pynmih ïa ki khubor lait kam ha ki lad pathai khubor ha Jylla.
Ka KSU ha ka kyrwoh ka la ong ba ka lap ïa kiba bun ki kam kiba lait ha kitei ki karkhana katba la pyllait ïa ki ha kiwei ki kot khubor sha kiwei pat ki Jylla kum sha Bihar, Assam bad kiwei-kiwei.
Kane ka jingleh jong kitei ki karkhana ka la pynbitar ïa ka seng bad ka pyni ba kim burom ne kheiñ snep satia ïa ki trai-ri ha ka liang ka ïoh kam ïoh jam.
Ka jingleh jong kine ki karkhana pynmih dewbilat ba don ha ka thaiñ East Jaiñtia Hills ka pyni shai ba ki kwah tang ban kjit ïa ka spah mariang jong ka distrik khlem da sngewlem tang khyndiat ruh ïa ki samla kiba la pyndep ïa ki kyrdan pule bapher-bapher bad kiba long tbit ban trei ha kata ka kam kaba dei hi ka laiñ pule jong ki.
Ka seng ka dawa na u DC bad kyntu ruh ba u dei ban tuklar ïa katei ka kam bad kim dei ban ïaid lait ha ka ban pynmih ïa kano-kano ka khubor lait kam ha ki lad pathai khubor jong ka Jylla.
Ka seng ka la pynbna ruh ba kan sa wanrah ïa ka ‘Job Fair’ ha ka thaiñ East Jaiñtia Hills ha kaba kine ki karkhana kin hap ban thep kam ïa ki samla ka thaiñ ryngkat ka jingïatreilang bad ka bor distrik lada long kaba lah.
Ka KSU ka la pyntip ba na ka liang u DC u la ong ba un ai da ka jingthoh sha baroh ki karkhana pynmih dewbilat ban ïakren ïa kane ka kam.
