Shillong, Jymmang 02
Namar ka jingma jong ka jingkyrduh um ka la ap hadien ka jingshit kyrang bad rang tyrkhong ka suiñbneng, ka tnat PHE ka la kyntu ïa ki paidbah ban long adkar ha ka rukom pyndonkam ïa ka um bad dei ban pyndonkam ïa ki lad kumno ban pynsoi ïa ka umbam-umdih katba lah da ka jingkitkhlieh.
Ka tnat PHE lyngba ka Chief Engineer, Kong B Lyndem ka la phah ïa kane ka jingpyntip sha ki paidbah hadien ba la sakhi ïa ka jingtyrkhong ki tyllong namar ka jingrang tyrkhong bad shit kyrang jong ka sngi nalor ka jingbeh jong ka lyer kaba la nang pyntyrkhong ïa ka mei mariang.
Kane ka jingbym hap slap ka la pynlong ruh ïa ki tyllong um ban nang kham rit bad rngat kynthup ïa ka jaka den um (dam) jong ka PHE kaba don ha Mawphlang. Kane ka jaka den um ka dei kaba ju sam umbam-umdih sha ki paid nongshong shnong ka nongbah Shillong bad kiwei ki jaka lyngba ka Greater Shillong Water Supply Scheme (GSWSS).
Ka Chief Engineer ka la pyntip ba namar ka jinglong ka suiñbneng kaba pyntyrkhong ïa ka mariang bad namar bun kiwei pat ki daw, ka jingdon ka um ha Dam Mawphlang ka la hiar bha.
Hynrei wat lada ka um ka la hiar, ka jaka pynlang um jong ka dam ka dang lah ban sam um sa lai ne saw bnai wat hapdeng kane ka jinglong-jingman kaba mynta.
Kumta la kyntu ïa ki paidbah ban adkar ka rukom pyndonkam ïa ka um bad ban pyndonkam ruh ki buit ki lad kumno ban pynsoi ïa ka um katba lah.
“Ka jingpynneh bad pynsoi ïa ka um kam dei kaba shu donkam hynrei ka dei ka kamram ka ban pyntikna ïa ka jingsam um kaba neh na ka bynta ki paidbah,” la bynrap ka Chief Engineer.
