Shillong, Jymmang 03
Ka lympung ïalehkai Super Division Cricket League 2024 ba la pynïaid da ka Shillong Sports Association ka la nangjam shaphrang ha kaba ka Royal CC ka la ïoh jingjop hadien ba ka la lah ban pynliem noh ïa ka NFU da 8 wiket ha ka Sngi Thohdieng ha madan Polo.
Ha kane ka jingïakhun ka NFU ka la kam trai ban tied nyngkong ha kaba ka la kamai 140 run bad shah pynhap 10 wiket ha ki 36.0 over. U Asif Khan u la khyrwit ïa ka shiteng spah da kaba ïoh 50 run na ki 89 bol bad u Shubham Rasaily u la ïoh 15 run na ki 30 bol. Katba u Abhishek Kumar u la shim 3 wiket ha ki 9 over bad 2 wiket da u Pringsang ha ki 5 over na ka bynta ka Royal.
Haba wan shimti ïa ka pali kaba ar ka Royal ka la lah ban kynjoh sha ka thong. U Raj u la khyrwit ïa ka shiteng spah da kaba ïoh 71 run na ki 38 bol bad u Nishanta Chakraborty u la ïoh 30 run na ki 40 bol. U Netesh Sharma bad u Asif Khan ki la shim mar shi wiket na ka bynta ka NFU. Ïa ka nam Player of the Match la ïoh da u Abhishek Kumar.
