Shillong, Jymmang 03
Ka Subroto Mukerjee Sports Education Society kaba hap hapoh ka jingkhmih jong ka Air Force Sports Control Board ka la pynbna ban sdang noh ïa ka lympung ïalehkai 63rd International Subroto Cup Mukherjee Football Tournament naduh 30 tarik u Naitung haduh 11 tarik u Nailur mynta u snem.
Ki skul kiba lah ban ïashim bynta ha kane ka lympung kin dei tang kiba la rah nam lahduh ha ki jylla bapher bapher jong ka ri ha ki kyrdan ïalehkai Under-14 jong ki shynrang bad Under-17 ha ka liang ki kynthei bad shynrang. Kin don ruh katto katne ki skul nabar ki ban shah khot ïashim bynta lang ha kane ka lympung kaba heh duh jong ka ri.
Kumba long ha u snem ba la lah, ka nongbah Delhi kan ïoh ban pynlong ïa ki ar tylli ki kyrdan ïalehkai kata ka Under-17 jong ki shynrang bad kynthei, katba ïa ka kyrdan ïalehkai Under-14 ki shynrang yn pynlong ha Bengaluru.
Kat kum ka kyrwoh la ong ba baroh ki skul ki dei ban pynlong ïa ki lympung ïalehkai naduh ki District Level haduh ki State Level ha shwa ban sei ïa ki kynhun kiba long ki lahduh ban ïoh ïa ka lad ban leit ïashim bynta ha katei ka lympung.
Lah ban kdew ba kane ka lympung ka long ka jingplie lad ba kin pynpaw ïa ki sap ïalehkai ba kyrpang jong ki khnang ba kin shah jied ha ki klob bapher bapher jong ka ri, kumjuh ban ïoh ïa ka lad ban mihkhmat ïa ka ri India ha ki lympung ïalehkai shabar ri bad kumjuh kin ïoh ruh ïa ka bai-bam (scholarship) na ki bor pynïaid jong ka Air Force.
