Shillong, Jymmang 03
U Myntri Rangbah ka Jylla u Conrad K Sangma u la ong ba haba kem ïano-ïano ka dei katkum ki sabut bad haba kem ïa ki briew kiba donkti ha ki kam runar kam dei ba kem ha kyrteng jong kano-kano seng.
Haba kylli halor ka jingthut ka suk ka saiñ namar ki jingjia kum ka jingbteng ki jingjia kawang petrol bom ha Shillong, u Myntri Rangbah u la ong ba ka Sorkar ka la shim ïa ki sienjam ban tehlakam ïa kino-kino ki kam kiba lah ban pynthut ïa ka suk ka saiñ.
U la ong ba ka Sorkar ka ïeng skhem ha ka nongrim ban pynneh ïa ka suk ka saiñ bad jingshngaiñ ïa ki nongshong shnong ka Jylla.
U la ong ba haba kem ïa ki briew kiba donkti ha kine ki kam runar, la pynshong nongrim katkum ki sakhi kiba khlaiñ bad ym lah ban shu kem ïano ïano.
U la ong ba lehse ka jingbteng kine ki jingjia ka lah ban dei ka jingpynphai kylla namar kaei kaba la jia.
Kumta u la ong ba kum kine ki jingjia kim dei ban jia bad ki bor pahara ki la shim ïa ki sienjam ban tehlakam bad ym lah ban ïathuh ïa ki lad ki lynti kiba ki pulit ki la shim ban pyntikna ba ka suk ka saiñ kan neh.
U la ong ruh ba ka jingkem ïano-ïano kam dei kaba shu leh khlem ki sakhi namar ki jingjia kiba la jia bad ym lah ban shu kynnoh ïano-ïano ha ka kyrteng jong kano-kano ka kynhun ne ka seng hynrei ka dei katkum ka jingpynshisha bad ki sabut kiba biang.
Ha kine ki khyndiat taïew, ki jingjia shah kawang petrol bom ki la nang ïai jia ha nongbah Shillong ha kaba ki Thanat bad ki kali Sorkar ki la shah wiang ding namar ka jingshah kawang petrol bom kaba la bteng man ka por.
U la ong ruh ba ki pulit kim lah ban tip lut bad tip lypa ïa ki jingjia hynrei ka jingpynkhreh lypa ka don ban ïada katba lah na kino-kino ki kam sniew. U la kyntu ruh ban nym shim ïa ka aiñ ha kti lajong bad ban pynneh ïa ka suk ka saiñ.
