Shillong, Jymmang 03
Ha kawei ka jingjia ha ka shnong Barato, West Jaiñtia Hills, uwei u rangbah u la shah siat ïap na ki bynta jong ka khlieh katba u dang thiah ha la ïing.
Katkum ka khubor ba la ïoh lum na ki pulit ha ka Sngi Thohdieng, la ong ba ha ka 1 tarik Jymmang ha ka por kumba 2 baje mynstep, ki runar ki bym pat lah ban ithuh, ki la siat ïap ïa u Bah Tobias Dkhar, 47 snem ka rta, katba u dang thiah ha la ïing ha ka shnong Barato.
La suba ba kita ki runar ki la pyndonkam da ka suloi SBBL (Single Barrel Breach Loading) ban siat ïap ïa utei u rangbah na khlieh. Hynrei ïa kane yn sa lah ban kham pynthikna ynda la pyndep ïa ka jingpeit bniah ïa u kuli. La ong ruh ba ki nongsiat ïap ki la pyndonkam tang uwei u kuli.
Hadien ba la pyndep ïa ka ‘post-mortem’ ha Ïalong Civil Hospital, ïa ka met kaba sah jong u Bah Tobias la aiti noh sha ki bahaïing hasem bad ïa ka jingontep la pyndep ha ka Sngi Palei.
Ka tyllong khubor ba la ïohlum ka ïathuh ba u Bah Tobias u trei u ktah kum u nongbylla sngi. Na ka liang ki bahaïing hasem ki la dep ban ai da ka jingujor halor katei ka jingjia bad ka jingtohkit ban lap ïa kiba donkti ka dang ïaid shakhmat. Haduh mynta, ym pat lah ban tip ne ithuh mano kiba la donkti ban dkhat ïa ka jingim jong utei u rangbah.
Nalorkata, la ïathuh ba ha ka por ba u Bah Tobias, uba la don khun don kti, u la shah siat ïap ha ïing, ki la don lang kiwei pat ki bahaïing hasem kiba la ïohthiah.
