Imphal, Jymmang:
Ha kaba ïadei bad ka jingïai bteng jong ka jingpyntreikam ban pahara ha ka khappud Manipur-Myanmar ki shipai jong ka tnat Assam Rifles ki la lah ban wanrah ïa ka jingjop ha kaba ïadei bad ka jingïakhun pyrshah ïa u drok. Ha kaba ïadei bad kane, ka kynhun jong ki shipai ka la ïoh ban kem ïa uwei u nongkhaïi drok uba la 27 snem ka rta. Ki shipai ki la ïoh ruh ban kurup ïa u drok Brown Sugar.
Kane ka jingïoh ban kem ïa une u briew ka la long ha ka por ba ka la don ka jingpahara. Ïa kane ka jingleit pahara la pynlong da ki shipai ka tnat Assam Rifles ha ka shnong Songdoi, kaba don ha Churachandpur distrik jong ka Manipur. Ïa ka jingpyntreikam la pynlong ha ka 1 tarik, Jymmang. Une uba la shahkem ha kaba mynta u dang don ha kti ki pulit na ka bynta ka jingshah tohkit la tip kyrteng kum u Nangzading.
Une u dei u nongshong shnong jong ka New Lamka kaba don ha Churachandpur distrik. U Nangzading u la shahkem ha ryngkat 660 grams u Brown Sugar. Ïa une u drok la buhrieh bha hapoh ki synduk sabon. Kane ka jinglap la sakhi ïa ka rukom buhrieh jong ki nongkhaïi drok khnang ban lait na ka jingshahkem. Kumba la khmih bniah, la ong ba ka dor jong une u drok ba la ïoh ban kurup ka la kot sha ka T. 1.32 klur.
