Shillong, Jymmang 03
Ha kawei ka jingjia ba la pyntip da ki pulit, la ong ba ha ka 1 tarik Jymmang, uwei u nongshong shnong ka Bangladesh u la rung be-aiñ shapoh u pud u sam jong ka India, bad u la shah kem bad shah shoh shah dat ha ki paidbah jong kawei ka shnong kaba hap ha Bholaganj PCP ha East Khasi Hills.
Ka khubor na ki pulit ka ïathuh ruh ba utei u nong Bangladesh u la lait phet noh na ki kti jong kita ki paidbah. Kham hadien, ki pulit ki la lap ïa utei u nong Bangladesh uba la thiah lyngktar ha kawei ka jaka ha ka shnong Kurikhal, East Khasi Hills, hapdeng ka jingbym tip briew.
Na ka liang ki pulit ki la pynkynriah noh ïa utei u briew sha Ichamati Community Health Centre (CHC) ba u doktor uba la peit bniah ïa utei u nong Bangladesh u la pynbna ba u la dep khlad lypa.
Ki pulit ki la pynkynriah noh ïa ka met kaba sah jong utei u nong Bangladesh sha Shillong Civil Hospital khnang ba ki doktor kin ïoh ban pyndep ïa ka ‘Post-Mortem’.
