Shillong, Jymmang 03
Ka synjuk ki nongñiah kali kamai kaba la tip kum ka East Khasi Hills Local Taxi Welfare Association (EKHLTWA) hapoh ka jingïalam u President, u Bah Wandonbok Jyrwa ha ka 3 tarik u Jymmang ki la leit ban ïakynduh ïa u Deputy Chief Executive Member (CEM) ka KHADC, u Bah Pynshngaiñ N. Syiem ban pynsngew ïa ka jingeh ha kaba ïadei bad ka jingsiew ‘online’ ïa ka Professional Tax.
Haba kren sha ki lad pathai khubor, u Bah Wandonbok Jyrwa u la ong ba ka jingeh bad ka jingpynjynjar jong ka Council ïa ki nongsiew khajna sha ka Council ka long ba ki la phah siew da ka ‘online’ bad wat la ïa kane ka rukom siew lyngba ka ‘online’ ki la pdiang ïa ka katkum ka juk kaba ïaid mynta, hynrei ha kawei pat ka liang ka jingleh jong ka Council ka la buh pat ïa ki ha ka jingeh namar ïa ki barim ruh ki hap ban thep kum kiba dang thymmai bad ka long kaba jynjar ruh namar haba ki paidbah ki leit siew ‘online’, ki hap ban leit haduh san ne hynriew sien sha ki jaka ‘cyber’ bad kane ka la ktah shikatdei eh ïa ka pla ka tyngka jong ki.
“Ka jingeh ban siew lyngba ka ‘online’ ka dei namar ba ki khlem pynbiang lypa ïa ki kot ki sla kiba biang nangne”, la ong u Bah Jyrwa.
U Bah Wandonbok Jyrwa u la ong ba kane ka jingleit ïakynduh kam long kaba sepei namar ha ka jingïakren na ka liang u Bah Pynshngaiñ, u la kubur ba kino-kino kiba kwah ban siew lyngba ‘online’ kan ïaid beit shakhmat bad kiba kwah ban siew ‘offline’ ruh ki lah ban wan shapoh ka KHADC ban siew katba naduh u snem ban wan kata ha u 2025 kan pynïaid noh da ka ‘online’ ryngkat ka jingpynbit jingpynbiang napoh ka KHADC.
“Na ka liang jong ka Council mynta hi ka la pdiang ïa kane ban siew ‘offline’ ha kaba ïadei bad kane ka ‘Professional Tax’ bad na ka liang jong ngi ruh, ngi kmen ba ka jingwan ïakynduh jong ngi kam long kaba sepei hynrei ka long ka jingkyrkhu ïa ki paidbah kiba hap ban siew khajna hangne ha District Council”, la ong u Bah Jyrwa.
U Bah Wandonbok u la ong ba lyngba kane ka jingdkoh treikam jong ka Council ka pynpaw ba ka District Council kam don nongtrei bad lyngba kane ka pynpaw ruh ba ki nongtrei kim leh eiei wat la ki nongtrei hapoh ka Council ki bun.
