Shillong, Jymmang 03
U Myntri ka tnat PHE u Marcuise N Marak uba dei peit ruh ïa ka tnat Soil and Water Conservation, u la ong ba la jan baroh ki tyllong um ki la nang tyrkhong bad nang rngat ha kane ka aïom namar ka jingtyrkhong ka suiñbneng.
Kane ka jingïathuh u Myntri ka la nang pynskhem ruh haba peit ïa ka jinglong ka suiñbneng ha kaba ki wah kiba long ki tyllong umbam-umdih ki la ringswai ha kine ki sngi hadien ba khlem hap slap bad bteng ka jingbeh jong ka lyer kaba nang pyntyrkhong ïa ka mariang.
U Marak u la ong ba wat ki tyllong um kiba dei ban tan um na ka bynta ka skhim Jal Jeevan Mission (JJM) ki shah ktah namar ka jinglong jong ka suiñbneng.
U la ong ba ha Rilum Garo bun ki tyllong um ki la shah ktah bha ym tang ha Khasi Jaiñtia Hills bad ka jia namar ka jinglong ka suiñbneng ha ka pyrthei baroh kawei.
U Myntri u la ong ba ha nongbah Shillong, ka dam Mawphlang kaba ïoh um na ka Wah Umïew ka dei kaba kongsan ban sam umbam-umdih ïa ki nongshong shnong bad ha sor Tura ka wah Ganol ka dei ka tyllong um kaba kongsan na ka bynta ban sam um sha ki nongshong shnong.
U la ong ba kine ki wah ki dei kiba kongsan hynrei namar ka jinglong ka suiñbneng ki la nang rngat.
Kumta u la ong ba ka Sorkar ka la shim ki sienjam kum ka jingmang kumba T.344 klur ban pynneh pynsah bad ïada ïa ki wah kiba dei ki tyllong umbam-umdih kum ka wah Umïew bad wah Ganol.
U la ong ba ka dam Mawphlang ka don ruh ka jaka pynlang um kaba lah ban kyrshan ban sam um sa kumba 3 ne 4 bnai wat lada ka um ha ki tyllong um ka la nang rngad.
Hynrei ka wah Ganol kam don jaka pynlang um bad lada kane ka jinglong ka suiñbneng ka bteng ban long kumne, ka jingma ban kyrduh um kan nang jur.
U Marak u la ong ba ha Tura, na ka liang u Myntri Rangbah u la sdang ruh ban pyntreikam lyngba ka MLA skhim ban shna ïa ki jaka pynlang um (water reservoirs) na ka bynta ban tan umdih bad sam sha ki paidbah.
Haba kylli, kumno ka Sorkar kan leh ban weng ïa kane ka jingma jong ka jingkyrduh um, u Marak u la ong ba ka Sorkar ka la shim ki lad kum ka jingpynsngewthuh ïa ki paidbah ban sumar ïa ki tyllong um bad ki wah.
