Nongpoh, Jymmang:
Ka Conservation Training Institute (CTI), Byrnihat lem bad ka tnat Soil & Water Conservation ha ka Sngi Palei ka la lah ban pynlong ïa ka Passing Out Parade ban pynkup burom ïa phra ngut ki ophisar kiba la pyndep ïa ka 36th Batch Middle Level Technician Training Programme (MLTTP) kaba san bnai bad ïa phra ngut ki Field Assistant kiba la pyndep ïa ka 50th Batch Field Assistant Training Course kaba 11 bnai ha katei ka jaka ai jinghikai kaba don ha Byrnihat.
Ha kaba ïadei bad ka 50th Batch Field Assistant Training Course 2023-24, ki don kumba shiphew ngut kiba la shah jied ban ïoh jinghikai, hynrei ar ngut na kine kiba dei na ka jylla Assam, kim lah ban pyndep namar ka jingban ka jingshitom bad kiba la lah ban pyndep pat ki kynthup ïa lai ngut na ka tnat Soil and Water Conservation jong ka sorkar Assam, lai ngut na ka Jaiñtia Hills Autonomous District Council, bad ar ngut na ka tnat Soil and Water Conservation ka jylla Meghalaya.
Ha ka thup jong ka 36th Batch Middle Level Technician Training Programme (MLTTP) ruh ki don kumba 10 ngut kiba la shah jied ban shah hikai ha kane ka jaka, kiba kynthup ïa hynriew ngut na ka tnat Soil and Water Conservation jong ki District bapher bapher ha ka jylla Meghalaya, ar ngut na ka Jaiñtia Hills Autonomous District Council bad ar ngut na ka tnat Soil and Water Conservation jong ka jylla Arunachal Pradesh. Hangne ruh, kumba phra ngut ki la pyndep hok ïa ka jingshah jinghikai katba ar ngut pat ki la hap ban mih noh namar ka bym lah pynbiang ïa ki kyndon jong kane ka jaka ai jinghikai.
Ïa kitei khathynriew ngut ki samla kiba la pyndep ïa ar tylli kitei ki jait ai jinghikai ha ka CTI Byrnihat la wan ban pynkup burom da u Dr Joram Beda, uba dei u Commissioner and Secretary ka tnat Soil and Water Conservation kum u kongsan ha ka jingdonlang ka Kong I Rynjah, Director Soil and Water Conservation lem bad kiwei kiwei ki ophisar, ki nonghikai na CTI Byrnihat bad ki bahaïing hasem jong kiba la pyndep ïa ka jingshah ai jinghikai.
U Dr. Joram Beda haba kren ha katei ka sngi u la pynpaw ka jingsngewkmen shibun ban ïohi ba ki samla ki la pyndep hok ïa ka jingshah hikai ha ki phang bapher bapher bad u la ong ruh ba kano kano ka jaka ai jinghikai ka dap tang da ki jingsah jingkynmaw ha shuwa ban mih, wat hapdeng shibun ki jingeh. U la ai ruh ka jingïaroh ïa ki khathynriew ngut kiba shah hikai pyntbit ba kin pyndonkam hok ïa ka jinghikai kaba ki la ïoh ban pynneh pynsah ïa ka mei mariang bad kiwei kiwei ha shuwa ba kin leit ban trei pat sha ki tnat treikam sorkar ha ki jaka ki jongki.
Shuh shuh u la ong ruh kumba ka jingshit kyrang ha kine ki sngi ka la nang jur, ka jingkhluit jong ka pyrthei lane kata ka Global Warming ka dei kawei na ki mat kiba kine ki samla kiba pyndep ïa ka jingshah ai jinghikai pyntbit ki don ïa ka bynta kaba khraw ban pynneh pynsah ïa ka mariang sawdong sawkun bad kyntu ba ka jingstad kaba ki la ïoh lyngba kane ka shlem ai jinghikai kan long pat ka jingmyntoi na bynta ka jylla bad ka thaiñ hi baroh kawei.
Ha kane ka sngi la sam ruh ïa ki syrnod bad ki khusnam sha kitei ki samla kiba la wan shakhmat bad ïoh ïa ki marks ba heh ha ki phang (subject) bapher bapher bad ruh ha ki kam lehkai kum shi bynta ban ai mynsiem bad pynsahnam ïa ka jingtrei shitom ka jong ki.
