Mairang, Jymmang 03
U District Magistrate ka Eastern West Khasi Hills, u Bah, G. Kharmawphlang, IAS, u la pyntip paidbah, ba la ïoh jingtip halor ka jingdon jong ki briew kiba mlien ban tih shyiap lum da ka pyndonkam da ki kor tan um ban pynkhuid ïa ki shyiap lum kiba lum thup ha ki bynta jong ka shnong Langtor, Shyrwang bad Ksehkohmoit. Kane ka jingleh ym tang ba ka pynjaboh bad pynjngut ïa ki wahduid kiba don hajan kumjuh ïa ka Wah Kynshi hynrei ka buh jingma ruh ïa jingim jong ki don-um doh-wah bad kiwei pat ki jingthaw kiba im, kiba im ha ka wah Kynshi bad kiwei pat ki wahduid.
Ha ka kyrwoh khubor, u District Magistrate u la ong ba khnang ban ïada ïa ka jingpynjaboh ïa ki wahduid, ban ïada ruh ïa ka jingpynjot ïa ki doh-um doh-wah kiba im hapoh ka Wah Kynshi bad ka mariang, u la pynjari da ka kyndon 144 CrPC ban khang pyrshah ïa baroh kiba mlien ban tih shyiap lum ha ki bynta jong ka shnong Langtor, Shyrwang, bad Ksehkohmoit.
Shuh shuh u la ong ruh ba kane ka hukum kan treikam beit kumne tad haduh ban da pynbna da kumwei pat. Ka kyrwoh khubor ka ong ruh ba lada don kiba shem jingeh halor kane ka hukum ki lah ban wan ïakynduh ïa ki bor kiba dei khmih.
