Noida, Jymmang:
Shi sngi hadien ba ïa ki khynnah skul la lah ban pyllait na ki skul jong ki ha Noida, Greater Noida, Delhi bad Ghaziabad hadien ba kine ki jaka pule ki la shah byrngem pynbthei bom ha ka email, ha kaba hadien la lap ba ka dei ka khubor hamsaïa, ki la sdang biang ban leit sha skul ha ka sngi Palei.
Ki la don kumba saw tylli ki skul ha Noida bad Greater Noida kiba la pynmih noh ïa baroh na kine ki jaka pule hadien ba ki la ïoh ban pdiang ïa ka khubor byrngem lyngba ka email ha ka step jong ka sngi Balang, ha kaba kane ka la pyntieng pynsyier haduh katta katta ïa ki kmie ki kpa jong ki khynnah skul.
Katkum ka jingïathuh jong ka Commissioner of Police ka Laxmi Singh, la ong ba ki skul kiba la ïoh ïa ka khubor ha ka email ki kynthup ïa ka DPS Noida ha Sector 30, DPS ha Sector 122, DPS ha Knowledge Park 5, Greater Noida, bad Aster Public School ha Sector 3, Greater Noida West ha DPS Noida ha Sector 30, ki nongpynïaid skul ki la ïathuh ba ka jingleit skul biang jong ki khynnah hadien kane ka jingïohpdiang ïa ka khubor ka la hiar bha da 10% ha ka sngi Palei hynrei kam shym la don jingtieng shuh hapdeng ki kmie ki kpa bad ki khynnah skul,” la ong u heh jong ka kynhun ki nongpynïaid skul u bym shym kwah ban pynpaw kyrteng.
U Manoj Kataria, uba long u nongseng jong ka Gautam Budh Nagar Parents Welfare Society, u la ong ba kiba bun na ki kmie ki kpa kim shym don daw ei ei ha kaba ïadei bad ka jingbym phah skul ïa ki khun ha ka sngi Palei.
“Na ka jingpynshisha jong ki pulit bad ki lad phah khubor ba kane ka jingjia ka dei ka khubor hamsaïa, kiba bun ki kmie ki kpa ki la sngewhun ka mynsiem bad sngewshngaiñ ban phah skul ïa ki khun jong ki kumba ju phah,” la ong u Kataria.
Ha kaba ïadei bad kane ki dang don sa kumba katto katne ngut ki kmie ki kpa jong ki khynnah ki bym shym phah skul ïa ki khun ha ka sngi Palei.
