Washington, Jymmang:
Katkum ki khubor, la ong ba kawei ka nos na United States kaba la don kti ban pynïap ia bun ngut ki nongpang hapoh 3 snem, ha ka Sngi Saitjaiñ ka ïingbishar ka la rai ban set patok ia ka naduh 380 haduh 760 snem namar ki kyndon ain kiba la pynngat halor kitei ki kam pyniap briew kiba ka la leh ha kitei ki 3 snem ba ka don ha ka kam.
La ong ba katei ka nos ka la shim ia ka jingim jong 17 ngut ki nongpang ha ki 5 tylli ki jaka sumar hapdeng u snem 2020 haduh 2023.
Katei ka nos kaba la ithuh kum ka Heather Pressdee, 41 snem ka rta ka dei ka nongshong shnong jong ka nongbah Pennsylvania bad ka la phla ba ka don kti ha kitei ki kam pyniap briew ha kitei ki snem ba la leit.
La ong ba katei ka nos ka la ai da ki dawai ba long bih ia 22 ngut ki nongpang. Napdeng kine, dei tang 17 ngut kiba la khlad noh syndon bad ki bym lah shuh ban pynkhiah.
