Nongstoiñ, Jymmang 05
Ha ki por 3 baje janmiet jong ka Sngi U Blei, u phria uba jur u la khyrwit bad ther tyngeh ha ki katto-katne ki bynta bad ki shnong ka West Khasi Hills ha kaba bun ki ïing ki sem bad ki jingthung-jingtep ki la julor.
Haba pyntip ïa kane, na ka liang ki ‘riew rangbah na ka shnong Phudumbah, West Khasi Hills ki la ïathuh ba ha ka por 3 baje janmiet jong ka Sngi U Blei, u phira ba heh kat u sohphoh u la ther tyngeh.
Ki la ïathuh ruh ba ki jaka bajur eh jong ka jinghap u phria ki kynthup kum ha ka shnong Phudumbah Sepngi, Phudumbah bad Ranabah.
“Ka jingjulor ki ïing bad ki jingthung-jingtep ka la long kaba jur bad mynta kiba bun ki longïing kiba hap ban shah jhieh lada wan biang u slap,” la ong ki ‘riew rangbah katei ka thaiñ.
Ki la ong ruh ba ha kane ka jingther jong u phria la jan baroh ki ïing kiba tap da ka tin la bun kiba la pei.
Shuh shuh ki la ïathuh ba ha kaba nyngkong, ha ka por 1 baje mynsngi, u phria bad u slap uba kham rit bad u neh kumba 10 haduh 15 minit bad tang katto-katne, u wan biang ha ki por 3 baje ha kaba u phria uba kham heh u la wan bad neh kumba 20 minit eiei.
