Mairang, Jymmang 05
Ka St. Joseph’s Higher Secondary School Nongkasen ha ka sien kaba lai ka la ïoh ban rah biang ïa ka nam lahduh ha ka lympung ïalehkai ba la tip kum ka Eastern West Khasi Hills District Level Inter School Athletic Meet 2024 ba la pynlong da ka shlem treikam District Sports Officer, Nongstoiñ.
Ïa katei ka lympung kaba lai sngi lynter la ïoh ban pynhap pyrda noh ha ka sngi Saitjaiñ ha madan KSA Mission Mairang ha kaba u Deputy Commissioner ka Eastern West Khasi Hills u Bah G Kharmawphlang, IAS u la long kum u kongsan.
Ka jingïoh ka St. Joseph’s Higher Secondary School ban rah ïa ka nam lahduh ka dei hadien ba kane ka skul ka la khur 13 tylli ki takma ksiar, 8 tylli ki takma rupa bad 8 tylli ki takma rnong.
Shuh shuh ha kane ka lympung ïa ka nam ‘Best March Past’ la ïoh ban khur da ka St. Thomas Higher Secondary School katba ka Kynshi Higher Secondary School kala wan ha ka kyrdan kaba ar.
Nangta, ïa ka nam ‘Best Athletes’ ha ka liang ki shynrang ha ka U-14 la ïoh khur da u Joynistar Nongbah na ka Littlestar SS, katba ha ki kynthei la ïoh da ka Sngibarisha Warjri na ka Mainai SS.
Haba phai ha ka U-16 ki shynrang ïa ka nam ‘Best Athletes’ la ïoh da u Mewaki Aston Rashir na ka skul St Joseph’s Higher Secondary, ha ki kynthei la ïoh da ka Nameaihun-shisha Marwein na ka Mairang Pres SS.
Ha ka U-18 ïa katei ka nam ha ka liang ki shynrang la ïoh da u Lawan-phrang L Mawnai na ka Mairang Pres SS, bad ha ka liang ki kynthei la ïoh da ka Lasuklaiohdiang L Nongbri na ka Mairang Press H/S School.
Shuh shuh ïa ka nam ‘Best Team’ ha ka U-14 ki shynrang la ïoh da ka Little Stars English Medium Secondary School, ha ka liang ki kynthei la ïoh da ka Manai Secon-dary School Manai, ha ka U-16 ha ka liang ki shynrang la ïoh da ka Little Stars English Medium SS bad ha ka liang ki kynthei la ïoh da ka St. Thomas Higher Secondary Mairang. Ha ka U-18 kata ha ka liang ki shynrang bad kynthei la ïoh khur da ka St Joseph’s Higher Secondary School Nongkasen.
Ha katei ka sngi nalor u DC ka Eastern West Khasi Hills District u Bah Gideon Kharmaw-phlang, la don ryngkat ka DSO East Jaintia ka Kong Stephanie Rapsang, ka DSO WKH Kong Balarina Syiem, u Myntri ka Hima Nongkhlaw u Babu Boldness Nongum, ki nongkitkam shnong ki nongtrei Sorkar kiba la sam ruh ïa ki khusnam bapher bapher, ki khynnah skul, ki nonghikai bad kiwei kiwei.
