United Nations, Jymmang:
Ka United Nations ha kane ka khubor ka la ong ba ka jingleit hiar thma jong ka Israel sha ka thaiñ Rafah jong ka nongbah Gaza ka lah ban long ka thma pyrshah ia ki paidbah kiba lui-lui bad kan nang pynsniew shuh shuh ia ki kam ki jam bad ki jing-iarap ba la ialeh ban pyniaid na ki tnat bapher bapher sha kitei ki paidbah kiba don ha katei ka bynta jong ka Gaza.
Namar la ong ba katei ka thaiñ ka long ka bynta kaba pynsuk ia ki tnat iarap ban leit pynpoi ia ki lad jingiarap sha ki paidbah nongshong shnong jong katei ka nongbah Gaza hadien ba kitei ki tnat ki la shah khanglad da ki bnai bad kim shym la ioh ban leit rung ne pynpoi ia ki jingiarap sha ki paidbah ka Gaza namar jong ka thma kaba khlem kut jong ka Israel.
Dang ha ka taiew ba la dep, u Myntri Rangbah-duh ka Israel, u Benjamin Netanyahu u la ong ba ka Israel kan pynjur ia ka jingleit hiar thma sha Rafah wat hapdeng ka jingmaham bad jingdawa jong bun ki ri bad ki tnat bapher bapher jong ka pyrthei ba ka dei ban sangeh noh ia ka jingleit hiar thma sha katei ka bynta jong ka Gaza.
Namar kumba 1.2 Million ngut ki nong Gaza ki dei kiba shong hapoh katei ka nongbah Rafah, tang ba kin lait na ki jingma jong ka thma naba ka Israel ruh kam da kham pynthud ia katei ka thaiñ ba shong ki ‘riew paidbah baroh shi katta.
