Jowai, Jymmang 05
Ka Ummulong SS ka la ïoh rah ïa ka nam lahduh hadien ba ka la pynliem noh da 3 run ïa ka Efty United ha ka jingïakhun final jong ka lympung District Cricket League kaba la pynïaid da ka West Jaiñtia Hills District Cricket Association (WJHDCA) ha madan ïalehkai ka shnong Khliehrtyshi.
Haba phai sha ka jingïalehkai, ka Efty United kaba la jop ïa ka jingkynting pisa ka la rai ban kawang bol shwa. Katba ka Ummulong kaba tied nyngkong ka la kamai 203 na ki 31.3 over bad hap haduh 7 wiket ha ka jingïalehkai ba la wan pynthut da u slap shipor.
Kumta namar ka jingïaid jong ka por na ka jinghap slap, ki nongpynïaid ki la rai ban pynïaid noh lyngba ka DLS Method bad la khate ïa ka run bad ka over ha kaba la buh ka thong ïa ka Efty ba kan tied 83 run na ki 10 over ban jop.
Ka Efty haba beh ïa ka thong, ka la lah ban kamai 79 run na ki 10 over bad hap noh 6 wiket, bad ka la duna da 3 run kaba la pynlong ïa ka Ummulong ban khur ka jingjop bad rah syndon ïa ka nam lahduh.
Ki nongtied ka Ummulong kiba la synñiang run ki dei u Sylvester Mylliempdah uba la kamai 68 run, Camlyone Passah 49 run, katba u Pynskhem Phawa marwei u la shim 4 wiket bad shi wiket da u Sumarlang Lamare.
Na ka liang ka Efty, tang ar ngut ki nongtied jong ka, kiba kamai sha ki ar dak, kata u Carefully Gassah 13 bad u Riboklang Hynniewta 21 run. U Conrad Sana u la khur 2 wiket.
Ka khusnam ‘Man of the Match’ kala leit sha u Pynskhem Phawa bad Youngest Player of the Tournament ka leit sha u Eshan Siangshai.
U Sylvester Mylliempdah u la khur bun eh ki wiket kata 13 wiket na ki 6 tylli ki jingïalehkai kaba la pynlong ïa u ban khur ïa ka nam ‘Man of the Tournament’, bad u Chontre-i Man Lamare uba la kamai bun run eh haduh 303.
Ïa ki khusnam la sam da u kongsan u District Sports Officer bad Assistant Director of Sports Bah Khroobok Passah ha ka jingïadonlang u MLA ka Jowai bad ki nongkitkam ka WJHDCA bad MCA.
