Shillong, Jymmang 05
Ka jingkhyrwit ka ‘erïong bad ka jingther u ‘lapbah ha ryngkat u phria ha ka Sngi U Blei ka la ïalam sha ki jingjia lynshop mariang ha kiba bun ki bynta jong ka Jylla.
Katkum ki kaiphod ba la ïoh lum, ki don 21 tylli ki ïing kiba la shah ktah ha ka shnong Mawlynrei, East Khasi Hills.
Ha kajuh ka por, ka la don ka jinglynshop mariang ha ka shnong Kha-rang kaba hap hapoh Mawkynrew Block, East Khasi Hills.
Ha kane ka jingjia kaba la jia ha ka por 3:30 mynsngi, ka longïing jong ka Kong Tinalin Myrboh ka la shah ktah namar ka jinglynshop ka ‘erïong, hynrei ha kane ka jingjia ym shym la don mano-mano ba mynsaw ha kane ka jingjia.
Kumjuh, ka ‘erïong kaba jur ha ryngkat ka jinghap u phria ha Eastern West Khasi Hills ha kane ka sngi ka la ktah ïa 6 tylli ki shnong ba kynthup ïa ka Nongkhlaw, Mawïongkhri, Nongthyllep, Mawnai, Umshyiap, Phudbah bad Demdngiem.
Ha kane ka jingjia, 172 ngut ki briew ki la shah ktah bad 62 tylli ki ïing ki la julor ba kynthup ïa 56 tylli kiba la julor malu-mala bad 6 tylli kiba la julor bun.
Nalor kane, katei ka jinglynshop mariang ka la ktah ruh ïa ki jingthung-jingtep ha 1 hektar ka jaka ha katei ka distrik.
Ha Thadlaskeiñ Block, West Jaiñtia Hills, 4 tylli ki ïing ki la julor ba kynthup ïa kawei ha Lapangap bad 3 tylli ha Rudumplu. Ym shym la don mano-mano ruh ba la mynsaw ha kitei ki jingjia lynshop mariang.
Haba phai pat sha West Khasi Hills, kawei ka shnong ïa kaba la tip kyrteng kum ka Malangkhasi, Malangkona Circle ka la shah ktah namar ka ‘erïong kaba la wan lynshop ha ka step Sngi U Blei ha ka por 9:30 baje eiei.
Ha kajuh ka por, ki la don 5 ngut ki briew kiba la shah ktah na katei ka jingjia ba kynthup ïa 2 ngut kiba la rangbah bad 3 ngut kiba hapoh 18 snem ka rta.
Shuh shuh haba phai sha Nongstoiñ Block, ki la don 52 tylli ki jingjia lynshop mariang ha ka Sngi U Blei haduh 5:30 baje janmiet.
Ka jinglynshop mariang na ka jingkhyrwit ka ‘erïong bad ka jinghap phria ka la ktah ruh ïa 135 ngut ha Mawlieh Circle, 45 ngut ha Byrki Circle, 15 ngut ha Mawthir Circle, 15 ngut ha Mawlangsu Circle, bad 40 ngut ha Mawdoh Circle.
