Patna, Jymmang:
Naba ka la don ka jingsngew ktik jingmut na ka jingdon jong ka ilekshon Lok Sabha, ka seng BJP mynta ka la kular ban pynïoh 10 lak ka kam sorkar shwa ka ilekshon Assembly 2024 ha ka jylla Bihar.
U heh nongïalam jong ka seng BJP ha Bihar bad u Symbud Myntri Rangbah jong ka jylla u Samrat Chaudhary ha ka sngi Thohdieng u la ong ba ka sorkar jylla ka la don jingthmu na ka bynta ban pynurlong ïa ka jingkular jong ka ban pynbiang da 10 lak tylli ki kam sorkar sha ki nongwad kam.
Kane ka dei ka sien kaba nyngkong ha ka por ba dang ïaid shakhmat ka General Elections ba ka seng BJP ka la kren shaphang ki jingkular ha kaba ïadei bad ki kam ha kano kano ka jylla.
Kum ka jingmang lypa ha kaba ïadei bad ka jingpynbiang ïa 10 lak ka kam, u Chaudhary u la ong ba ka thong ba la buh ka dei ban urlong shwa ban pynlong ïa ka ilekshon Assembly ka ban long ha u snem 2025.
“Ka sorkar Bihar kan sa ïeng ha kaba ïadei bad ka jingkular ban pynbiang kam sorkar ba la wanrah da u Myntri Rangbah u Nitish Kumar,” la ong u Chaudhry.
Kum shi bynta ban thalaiñ tyngeh ïa u heh nongïalam jong ka seng Rashtriya Janata Dal (RJD) u Lalu Prasad Yadav, u Chaudhry u la ong, “Kane kam dei ka sorkar jong u Lalu ha kaba ka jingpyntreikam kam ïahap ei ei bad ki ktien ba la kren.”
“Khlem da ïaid lait na kano kano ka kyntien, u Chaudhary u la pynshisha da kaba ong ba ka jingtreikam mynta ha Bihar ka dei ban lum ïa ka kyrteng jong ki nongïoh myntoi na ka bynta ka jingthungkam sorkar.”
Ka thup kyrteng ka la dei ban don ïa ki jingtip ba bniah shaphang ki nongïoh myntoi kynthup ki kyrteng bad kiwei pat ki jingpynshisha kiba bniah”, u la ong.
