Adilabad (Telangana), Jymmang 05 (UNI)
U Myntri ka tnad kam pohïing ka Sorkar Pdeng, u Amit Shah u la kular ba ka BJP kan pynneh ïa ka bhah kaba la mang na bynta ki Schedule Caste (SC), Schedule Tribe (ST) bad ki Other Backward Classes (OBC).
Haba ai jingkren ha ka jingïalap ilekshon ha Kagaznagar ha kane ka distrik ha ka Sngi U Blei, u Shah u la pynpaw ïa ka jingkyrmen skhem ba ka Sorkar u Modi kan wan biang ha ka bor synshar ha ka sien kaba lai.
Hadien jong 2 tylli ki kylla ilekshon kiba la dep, u Shah u la ong ba ka BJP kan ïoh jingjop ha 100 tylli ki konstitwensi. Ha Telangana, ka ‘vote’ jong ka BJP ka la nang kiew bad ka seng ka khmih lynti ban jop ha 10 tylli ki konstitwensi ha kane ka ilekshon ban wan sha ka Lok Sabha ka ban long ha ka 13 tarik mynta u bnai.
Ka rukom ïalap ilekshon u Shah ka ïapher na ka jong u Modi, uba ju rakhe ïa ki tamasa bad ki shipai, na ka jingleit shuti u Rahul Gandhi sha Bangkok.
U la ong ba ka jingbna nam jong u Modi, ka sawa jam sha kano-kano ka jaka ba u leit.
Ha kajuh ka por, u la kynnoh ïa ka Congress halor ka jingpynthut ïa ka jingshna ïa ka Ram Mandir la 70 snem mynta, bad la lah ban pyndep ïa ka hapoh ka jingïalam u Modi.
U Shah u la pynpaw ruh ka jingsngewsih halor ka jingbym donlang jong President ka AICC, u Mallikarjun Kharge bad u Rahul Gandhi ha ka jingplie ïa ka Ram Mandir, da kaba kynnoh ba ka dei namar ka saiñ pyrthei khroh ‘vote’.
Haba pynkynmaw ïa ki jingjop jong ka Sorkar NDA hapoh ka jingïalam ka BJP, u Shah u la kren halor ka jingseisoh jong ka ‘Surgical Strike’ ha kawei ka ktem lehnoh kaba ha Pakistan bad ka jingpyninam ïa ka lama lai rong ha Kashmir.
U la kynnoh ïa u Owasi bad u Rahul Gandhi halor ka jingïasam ïa kajuh ka ‘vote bank’ bad kdew halor ka jingbym don jong ki jinghiar thma na ki lehnoh ha ka por jong u Modi.
Na ka liang u Shah u la pynrem ruh halor ka jingpynsaphriang jong ka Congress ïa ka dur khih ba lamler halor ka jingkynnoh ba ka BJP ka don jingthmu ban pyndam ïa ki bhah ba la mang. U la ban biang halor ka jingïeng skhem jong ka BJP ban ïada ïa ka bhah jong ki SC, ST bad OBC.
Haba kynthoh ïa ka Sorkar BRS kaba hashuwa, bad ka Sorkar Congress kaba mynta halor ka bamsap ha Telangana, u Shah u la kular ba ka BJP kan sa shimkhia ïa ki projek kiba la shah ieh bad kular ban wanrah ruh ïa kiba thymmai ynda la wan ha ka bor.
