Shillong, Jymmang 05
U kyrtong ba la pynïeng da ka Regional Democratic Alliance (RDA), Bah Robertjune Kharjahrin na ka United Democratic Party (UDP) bad kaba la kyrshan ruh da ka Hills State People’s Democratic Party (HSPDP) u la ong ba ka kamram jong u kum u kyrtong ban leit pan jingkyrshan na ki paidbah ka la kut haduh ka 19 tarik Ïaïong 2024 kaba dei artad ka sngi ba ki paidbah ki shim ïa ka rai.
Haba kylli u sngew don ne em ka jingkyrmen haba ka jingñiew ‘vote’ kan long sa shibnai kaba dei ka 4 tarik Jylliew 2024, u Bah Robertjune u la ong lada ki paidbah ki jied ïa u ha kane ka ilekshon MP Lok Sabha na Shillong Parliamentary Constituency un trei ïa la ka jong ka kamram. Hynrei lada ki paidbah kim pat imon, u la rai ba un dang trei shitom arshah na ka bynta ka seng UDP haduh ba ki paidbah kin jied ïa u.
U Bah Robertjune u la ong ba ma u ryngkat ki nongkitkam, ki nongkyrshan na ka seng UDP bad HSPDP ki la trei shitom ban leit pynsngewthuh ïa ki paidbah ryngkat ki nongrim kiba skhem ha kane ka ilekshon MP.
Namar kata, u don jingkyrmen ba ki paidbah ki dei kiba stad ban shim ïa ka rai ha kane ka ilekshon. Kumta, u la ong um lah ban tip ïa ka jop ne ka rem, hynrei un ap beit ïa ka rai ha ka 4 tarik Jylliew.
“Ngan pdiang beit ïa kaei kaba ki paidbah ki rai ha ka 19 tarik Ïaïong 2024 bad lada ki pynjop ngan dang trei shitom ïa ki paidbah bad lada ngam poi sha ka thong nga la rai ba ngan trei shitom ryngkat ka seng UDP bad HSPDP na ka bynta ka jingbit jingbiang jong ki paidbah” u la ong biang.
Kum ban shu pynkynmaw, ki kyrtong kiba ïakhun ïa kane ka ilekshon MP Lok Sabha na Shillong Parliamentary Constituency ki long ka Kong Ampareen Lyngdoh na ka NPP, Dr. Ricky A.J Syngkon na ka VPP, Bah Robertjune Kharjahrin na ka UDP, Bah Vincent Pala na ka Congress, Bah Lakhon Kma bad Bah Peter Shallam kum ki kyrtong shimet.
