Shillong, Jymmang 05
Ka Voice of the People Party (VPP) ka la ong ba ki nongthep ‘vote’ ba jar-jar ki la noh sha ka seng naduh ka por jong ka ilekshon sha ka ïingdorbar thawaiñ ha u snem ba la dep.
“Ki nongthep ‘vote’ ba jar-jar phin lap naduh ka por jong ka ilekshon MLA…kine ki noh sha ka VPP. Phin lap ki nongthep ‘vote’ ba jar-jar ha Shillong…peit kum ka Mawryngkneng, Mylliem. Dang nyngkong, ki briew kim poi pyrkhat ba ka VPP kan jop kumto,” la ong u nongaiktien ka VPP, Dr. Batskhem Myrboh.
Haba kdew ba don ki ‘riewshemphang ha ka saiñ pyrthei kiba pynpaw ba ka VPP kan jop eh tang ha kawei ka konstitwensi lane ym ïoh eiei ha ka ilekshon MLA (2023), u la ong ba ka risol kaba mih ka la pynkyndit ïa baroh wat ïa kito ki ‘riewshemphang ha ka saiñ pyrthei, kumjuh ki seng bapher-bapher kiba la kyndit lut ïa ka jingkhlaiñ u ‘Prah’.
“Hangto phin lap ba ki nongthep ‘vote’ ba jar-jar ki noh bha sha ka VPP – naduh ka ilekshon ha u snem ba la dep sha ka ïingdorbar thawaiñ,” u la ong.
Ha kajuh ka por, haba ïathuh ba ka jingnoh jong ki nongthep ‘vote’ ba jar-jar (sha ka seng) ka dang jur shuh-shuh ha ka ilekshon MP, u Dr. Myrboh u la ong ba ha kane ka ilekshon ba dang shu dep, ka jingdon jong ki nongthep ‘vote’ kiba noh sha ka seng ka la khleh lang; kito kiba jar-jar bad kito kiba mih bad pynpaw ïa ka jingkyrshan jong ki.
“Phin lap ba kito kiba mih sha ki jingïalang, ki dei shi bynta jong ki nongthep ‘vote’ ka VPP, hynrei ki don ruh sa shi bynta pat kiba long kiba jar-jar,” u la ong.
Haba kren halor ka jingkyrshan radbah jong ki paidbah ïa ka VPP ha man la ki jaka, u nongaiktien u la ong ba kito kiba na kiwei pat ki seng saiñ pyrthei kiba mynshuwa ki pynpaw beit ka jingkyrshan jong ki ïa kata ka seng, hadien ba ïohi ïa ka jingkhlaiñ ka VPP ki kylla long kiba jar-jar.
Haba kylli, u la ong, “Katkum ki kaiphod ba ngi ïoh bad ka jubab kaba ngi leit sha ki jaka, ngam ïohi ba ngin don jingma na kiwei pat ba ngin ym jop ha kane ka ilekshon.”
Halor ka ilekshon ba dang shu dep, utei u nongïalam u la ong ka VPP ka la leh bha, bad ba kawei kaba kham pyntikna ïa ka jinglehbha jong ka seng ka long halor ka jingkiew ka jingdon kiba wan thep ‘vote’ khamtam ha ki thaiñ nongkyndong.
“Haba bun ka jingwan poi ki nongthep ‘vote’, barabor ka wanrah ïa ka jingkylla. Lada hiar, kiba bat ïa u lakam synshar ki kham ïohnong…kane ka dei ka rukom long jong ka ilekshon,” u la ong.
Shuh shuh u Dr. Myrboh u la bynrap, “Ha kane ka ilekshon ba mynta, ka jingwan poi ki nongthep ‘vote’ ka khlaiñ bha bad kane ka kham khlaiñ ha ki kynthei. Hangne phin lap ba ka VPP kan ïohnong na kane ka jingkiew ha ka jingdon ki nongthep ‘vote’ khamtam ka jingmih bha na ki thaiñ nongkyndong bad kumjuh ki kynthei.”
