Khliehriat, Jymmang 05
Ka Kyrmen Foundation da ka jingïateh bad ka Rangdajied United Football Club (RUFC) ka la sdang ïa ka jinghikai ba shisnem lynter na ka bynta ban sei ïa ki khynnah ïalehkai phutbol shynrang bad kynthei kiba kynsai tam napoh ka District.
Ïa kane ka jinghikai kaba tip kum ka ‘Kynsai Football Coaching Programme’ la sdang ha ka 4 tarik Jymmang ha madan Artificial Turf kaba don ha Diengshynrum, East Jaiñtia Hills District ha kaba la don 200 ngut ki khynnah ba la bynta ha ka kyrdan Under-10, 12, 14 bad 16 bad kine ki khynnah ki dei kiba la pyndep ïa ka jingpyrshang ne Trial ha kane ka jinghikai.
Ïa kine ki khynnah yn hikai da ki Coach batbit jong ka Rangdajied United Football Club bad ka jinghikai kan long arsien shi taïew kata ha ka janmiet sngi Palei bad step sngi Saitjaiñ.
U Bah Kyrmen Shylla u la sam ïa ki Puma Training Kits sha baroh ki khynnah ha jingdonlang u trai jong ka Rangdajied United FC u Bah Eugeneson Lyngdoh, ki MDC ka JHADC ba kynthup u Deputy CEM Bah Lasky Rymbai, Bah Finlyness Bareh, ki nongïalam bad dkhot nongkitkam ka East Jaintia Hills District Football Association, ki waheh shnong bapher, ki kmie ki kpa nalor kiwei kiwei ki riew rangbah ka thaiñ.
