Shillong, Jymmang 05
Ka jingïakhun khatduh jong ka Round Robin ha ka lympung Shillong Premier League (SPL) ka la kut noh ha ka Sngi Saitjaiñ. Ha kane ka sngi kaba dei artad ka jingïalehkai kaba khatduh ka Mawlai Sports Club ka la lah ban pynliem noh ïa ka Nangkiew Irat Sports Club da 6-1 kol kaba la long ha SSA Stadium, First Ground, Polo.
Haba phai sha ka jingïalehkai, dei ka Nangkiew Irat kaba la ïoh ban thep ka kol nyngkong lyngba u Felix Lalruat-sanga ha ka minit kaba 7. Dei tad haduh ka minit ba 29 ba ka Mawlai ka la ïoh ban pynphai ïa kane ka shi kol lyngba u Fullmoon Mukhim kaba la wan lyngba ka penalty bad ha ka minit ba 36 u Romarius Laban u la thep ïa ka kol ka Mawlai bad ban tam da 2-1 kol haduh ba kut ka kylla step.
Ha ka kylla miet, ki rangïalehkai ka Mawlai SC kiba la ïakhun tyngeh, ki la ïoh ban khyrwit kol biang, kata u Kevin Rymbai ha ka minit ba 65, u Donlad Diengdoh ha ka minit ba 68, u Pynbha Suting ha ka minit ba 73 bad u Mark G Shabong u la thep ha ka minit ba 87.
Lyngba kane ka jingjop, ka Mawlai ka la khur 16 point na ki 7 tylli ki jingïakhun bad ban don ha ka kyrdan ba-ar, katba ka Rangdajied United kaba la kamai 18 point ka don ha ka kyrdan ba nyngkong. Ka Shillong Lajong kaba la kamai 15 point ka don ha ka kyrdan ba lai bad ka Langsning ruh kaba don 15 point ka la don ha ka kyrdan ba saw.
Ka jingïakhun semi-final jong kane ka lympung kan sdang ha ka 7 tarik mynta u bnai, ha kaba ka Rangdajied United kan ïakhun pyrshah ïa ka Shillong Lajong bad ka jingïakhun semi-final kaba ar pat kan long ha ka 8 tarik ha kaba ka Mawlai SC kan ïakhun pyrshah ïa ka Langsning FC bad kine ki jingïalehkai kin long ha ka por 3.15 mynsngi ha madan SSA Stadium.
La khmih lynti ba kitei ki ar tylli ki jingïakhun kin long kiba itynnad namar baroh saw tylli ki club ki dei kiba khlaiñ bor ha kane ka lympung bad ha ka sngi ka jong ki, ki lah ban khyrwit bun kol, kumba la sakhi ha ki jingïalehkai kiba la dep.
