Nongstoiñ, Jymmang 05
Ka Blue Bomber’s FC ka la ïoh rah ïa ka nam lahduh ha ka lympung Invitation Knock-Out Foot-ball Tournament (IKOFT) ba la pynïaid da ka New Nongstoiñ Sport and Cultural Club (NNSSCC).
Ka jingïoh rah ka Blue Bomber’s ïa ka nam lahduh, ka dei hadien ba ka la pynliem ïa ka kynhun ïalehkai jong ka Ri Bhoi United da 3-0 kol ha ka jingïakhun final pyrshah kaba la long ha ka sngi Saitjaiñ ha madan ïalehkai ka shnong New Nongstoiñ.
Ha kane ka jingïalehkai, ïa ki kol ka Blue Bomber la ïoh thep da u Nam ha ka minit ba 67, u Stephan ha ka minit ba 77 bad u Chester ha ka minit kaba 90+3.
Ka Blue Bomber kaba la rah ïa ka nam lahduh ka la ïoh khur ïa ka song pisa kaba 8 lak tyngka ryngkat ka trophy katba ka Ri Bhoi United kaba la liem ha ka final kala ïoh ka song pisa ba 4 lak tyngka ryngkat ka trophy. Shuh shuh ha katei ka sngi, ïa ka nam ‘Man of the Match’ la ïoh ban khur da u Stephan Pale na ka Blue Bomber’s.
