Canada, Jymmang:
Ki pulit ka Canada ha ka Sngi Thohdieng ki la pynbna ba ki la ioh kem noh ia 3 ngut ki nong India kiba la suba ba dei ki dkhot jong ka kynhun kaba leit thombor ia u lehnoh Khalistan bad uba dei nong Canada u Hardeep Singh Nijjar. Une u lehnoh Khalistan u dei uba la shah pyniap mynshem snem.
Namar la ong ba ka jingshah pyniap u Nijjar ka la wanrah ia ka jing-iakynad hapdeng ka India bad ka Canada, ha kaba ka Canada ka la kynnoh ba ki dei ki briew kiba ka India ka phah khnang ban leit thombor ia utei u lehnoh uba la kylla long u nongshong shnong ka Canada. Hynrei ka daw bah ba ka Canada kam sngewtynnad ia katei ka jingjia, ka long namar ba ka India ka leit ban tuklar bad wat ban shim syndon ia ka jingim jong utei u nongshong shnong ka Canada hapoh u pud- u sam jong ka ri Canada bad kumta hi naduh katei ka por, ka Canada ka la byrngem ba kan phah wad bniah haduh ban da lap ia kiba don kti baroh ha ka jingpynïap ia utei u lehnoh hapoh Canada khlem ka jingtip jong ki bor pyniaid ne ka tnat iada jong ka ri Canada.
Kitei 3 ngut kiba ka Canada ka la kem ha kane ka por ki kynthup ia u Karan Brar (22 snem), u Kamalpreet Singh (22 snem) bad u Karanpreet Singh (28 snem), kiba long tang ki nongleit shong shipor ha Alberta mynta la kumba 3 haduh 5 snem eiei. Kumta la pynngat ruh ia ki hapoh ki kyndon pynkheiñ aiñ jong ka jingpynïap briew bad ka jingsuh buit ban leh kam sniew.
Hynrei, ki pulit ka Canada ki la iathuh ba kitei ki 3 ngut ki dei ki bym pat ju don dak sniew eiei bad ki pulit ha ki por ba la leit bad kumta ka jingtohkit bniah kan dang iaid shakhmat mynta ba ki pulit ka Canada ki la ioh kem ia kitei ki suba don kti ha katei ka jingpynïap ia utei u lehnoh ha u snem ba la leit.
Namar la ong ba ka Canada naduh kaba sdang ka la pharep ia ka India ba dei ka India kaba la phah ia ki briew jongka ban shim ia ka jingim jong utei u nong-ialam katei ka kynhun lehnoh hapoh u pud- u sam jong ka Canada. Katba, na ka liang ka India pat ka la kyntai bad thet-kti beit ba kam shym la ïadon bynta eiei haba iadei bad ka jingshah pyniap jong utei u lehnoh hapoh Canada namar ka India ka burom ia ka aiñ jong katei ka para marjan ri.
