Washington, Jymmang:
Ka ïingbishar jong ka US ha kane ka taiew ba la dep, ka la pyntip ba ki pulit ka Boston ki la lap ia 4 tylli ki metiap jong ki khyllung na ka kor thah ‘Freezer’ ha ka iing jong katei ka longkmie ha u snem 2022.
La ong ba ka ïingbishar ha kane ka por ka dang phah bud-dien bad phah wad bniah janai halor kane ka jingjia kaba la jia ha u snem 2022 bad kaba ka ïingbishar ka dang pynsahteng namar ka jingbym biang ki sabut bad ki jingdonkam ha katei ka por.
Hynrei u nongbishar u la ong ba kaba eh ka long ba ki nongbishar ruh kim lah ban pynngat kyndon ia ka-tei ka longkmie namar katto-katne ki daw kiba katei ka longkmie ka ieng skhem.
Kaba kham eh ruh la ong ba ki pulit kim lah ban lap ia ka daw bad ka por jong ka jingshah pyniap jong kitei ki khyllung kiba la lap na ka iing jong katei ka briew.
Ym lah ruh wat tang ban pyntikna la kitei ki khyllung ki dei kiba la kha iap lypa ne kiba im ha ka por ba dang kha ia ki sha kane ka pyrthei. Shuh shuh ruh la ong ba kim lah ban tip ba kumno ka Alexis Aldamir ka pun ia kitei ki khyllung bad balei ka thep ha katei ka kor thah ia kitei ki khun kiba ka la kha baroh. Namar ki pulit ki la iathuh ba katei ka jingjia ka la paw pyrthei hadien ba uwei u briew u la pyntip sha ki pulit ba ka kurim jong u ka la lap ia kitei ki khyllung na ka kor thah katba ka dang leit ban pynkhuid ia katei ka kamra jong ka para jong u. La ong ba kitei ki khyllung 2 ngut ki dei ki shynrang bad 2 ngut ki kynthei bad ki la kylla thah sawdong ha ka por ba la lap ia ki na katei ka kor.
