Amaravati, Jymmang:
Ki la don kumba 454 ngut ki kyrtong kiba ïakhun na ki 25 tylli ki Lok Sabha konstitwensi, katba 2,387 ngut ki nongbuh kyrteng ki la don bynta ha ka jingïakhun na ki 175 tylli ki Assembly konstitwensi ha Andhra Pradesh ki ban sa pynlong ïa ka jingthep vote ha ka 13 tarik, Jymmang, ha ka bynta kaba saw jong ka ilekshon kumba la pynbna da ka Election Commission of India.
U Chief Electoral Officer u Mukesh Kumar Meena u la ong ba ki la don kumba 49 ngut ki kyrtong ban ïakhun ha ka ilekshon Lok Sabha bad 318 ngut kiba la pynrung kyrteng ban ïakhun ha ka ilekshon Assembly kiba la weng noh ïa ki kyrteng jong ki.
Kiba bun eh na kiba la pynrung kyrteng ki dei na Visakhapatnam Lok Sabha konstitwensi ha kaba ki la don 33 ngut.
Katba kiba duna eh kata da 12 ngut ki dei kiba ïakhun na Rajahmundry Lok Sabha konstitwensi.
Haba phai sha ki Assembly konstitwensi, la ong ba ki la don 46 ngut ki kyrtong kiba ïakhun na Tiruapti, ha kaba kane ka la long kaba bun tam, katba 6 ngut kiba la pynrung kyrteng ki dei ki ban ïakhun na Chodavaram.
Ki la don kumba 40 ngut ki kyrtong kiba kyntup ïa u National Secretary jong ka seng Telugu Desam Party (TDP) u N. Lokesh ki la ïakhun na Mangalagiri Assembly konstitwensi katba 27 ngut ki kyrtong ki dei kiba ïakhun na Pulivendla Assembly konstitwensi ha kaba u Myntri Rangbah u Y.S. Jagan Mohan Reddy u la pynrung kyrteng.
Ki la don 13 ngut ki kyrtong kiba ïakhun na Kuppam Assembly konstitwensi, kaba long ka shnong jong u National President jong ka seng TDP u N. Chandrababu Naidu.
Kumjuh, ki la don kumba 13 ngut ki kyrtong kynthup ïa u President jong ka seng Jana Sena Party (JSP) u Pawan Kalyan kiba ïakhun na Pithapuram Assembly konstitwensi.
Ki la don kumba 14 ngut ki kyrtong kiba la don bynta ha ka jingïakhun na Kadapa Lok Sabha konstitwensi ha kaba u President jong ka Andhra Pradesh Congress Committee (APCC) u Y.S. Sharmila bad u MP jong ka seng YSRCP u Y.S. Avinash Reddy ki la pynrung kyrteng.
