Shillong, Jymmang 06
Ka North Eastern Hill University Teachers’ Association (NEHUTA) kan sa pynlong ïa ka jingïakhih ha ka Sngi Ba-ar da kaba leit tur sha shlem treikam u Vice-Chancellor (VC) kum ka dak ka jingpyrshah halor ka jingkuman ki bor pynïaid ka skulbah ban pynbeit ïa ki mat ba sahteng jong ka seng.
Ka seng lyngba ka kyrwoh na ki nongïalam ka pyntip sha baroh ki dkhot ba katkum ka rai ha ka jingïalang General Body jong ka NEHUTA kaba la long ha ka 2 tarik u Ïaïong, 2024, ka seng ha ka jingïalang Executive Committee jong ka kaba la long ha ka 1 tarik Jymmang, 2024, ka la rai ban pynlong da ka jingïakhih pyrshah ïa ka jingkuman ki bor pynïaid ka skulbah ha ka ban pynbeit ïa ki mat sahteng ba la slem jong ka NEHUTA.
Kitei ki kynthup ïa ka jingthung/jingthung biang (ha la ka mon) ïa ki Dean jong ki skul bapher-bapher, ha kawei ka liang kaba pynkheiñ ïa ka aiñ jong ka NEHU bad ka rukom long haba ïadei bad ka jingthung ïa ki Dean da ka pali katkum ka jingrangbah ha ka kam.
Ki nongïalam ki kdew ruh ïa ki mukotduma CAS ba sahteng na bynta baroh ki kyrdan ba kynthup naduh ka kyrdan ba 5 haduh 6 (Senior Professor) bad ka jingplied ïa ki ‘envelop’ ba ïadei bad ka jingpynbeit ïa ka tarik kiew kyrdan jong ki dkhot.
“Haba ïadei bad kane, ka NEHUTA ka kyrpad ïa baroh ki dkhot ban ïalum lang hakhmat jong ka Library ha ka por 2 baje noh phai sngi ha ka 7 tarik mynta u bnai bad hadien kane, ngin tur sha shlem treikam u VC ban pynpaw ïa ka jingpyrshah jong ngi,” la ong ka seng.
Ka NEHUTA kumta ka kyrpad ïa baroh ki dkhot ban ïadonlang ha kane ka jingïakhih khnang ba kan nang pynkhlaiñ shuh-shuh ïa ki mat kiba la rah da ka seng na bynta ka bha ka miat jong baroh ki nonghikai ka NEHU.
Ki nongïalam ki ong ruh ba ka NEHUTA ka ïeng na bynta ka jingbit-jingbiang jong ki dkhot jong ka ha baroh ki por ban wan.
Shuh shuh ki la bynrap, “Mynta, phi lah ban sngew ba phim shah ktah hynrei kynmaw, ki bor pynïaid ki long pyrshah ïa ki nonghikai bad ym don mano-mano ruh ki ban shngaiñ hadien habud lymda ngi ïeng tylli lang kawei ban ïakhun pyrshah ïa ki bor pynïaid kiba la pulom ha baroh ki liang ha ka ban wanrah ïa ka suk ka saiñ bad ka roi ka par hapoh skulbah ha kine ki 3 snem ba la leit.”
