Shillong, Jymmang 06
Ka jaka bret ñiut jong ka Shillong Municipal Board (SMB) kaba don ha Motphran ka la kylla long kum kawei ka jaka kaba paka bad biang tam na ka bynta ban pynïaid ïa ka jingdie bad dih drok.
Ïa kane la lap da ka Hynñiewtrep Youths’ Council (HYC) ha ka jinghiar jurip ha ka 2 tarik mynta u bnai. Halor kane ka bynta ka HYC ha ka Lah Sngi U Blei ka la leit ban buh syndon da ka jingdawa ha ka Shillong Municipal Board ba ka dei ban weng noh ïa katei ka jaka bret ñiut kaba don ha Motphran.
Ha ka dorkhas kaba la aiti sha u Chief Executive Officer (CEO) ka SMB, ka HYC ka la pynpaw ba hadien ba ka seng ka la ïoh pdiang ïa kiba bun ki jingujor na ki paidbah, ka la pynlong ka jingleit jurip ïa katei ka jaka bret ñiut kaba la buh da ka SMB ha ka 2 tarik mynta u bnai.
“Ha kane ka jingjurip, ngi la shem ba katei ka jaka bret ñiut jong ka SMB ym tang ba ka la pynmih ïa ka jingsma iwtung kaba la ktah ïa ki nongleit-nongwan na katei ka jaka hynrei ka la kylla long ruh kum ka jaka die bad jaka dih drok kaba ki nongdie bad nongdih ki la riehtngen ha kyndong jong katei ka jaka,” la ong u Vice President ka HYC u Bah Francis G Mawlong.
Une u nongïalam ka HYC u la ong, “Kitei ki jingjia ki la jia tang ha ka por mynsngi bad ba ka seng ka la ïoh kem ruh ïa ki briew kiba pyndonkam ïa u drok na katei ka jaka ha ka por ba ngi leit ban jurip. Ka jingdon jong katei ka jaka bret ñiut ka la long kum ka jaka kaba shngaiñ ïa kito kiba pyndonkam ïa u drok hakhmat jong ki paidbah bad nalor kane la pynkylla ruh ïa katei ka jaka kum ka Marten ïa kaba ym lah ban pdiang bad kaba hap ban pynrem da baroh namar ba ym shim la tap satia ïa ka ñiut kaba la saphriang ha ki surok jong ka nongbah.”
Ha kaba ïadei bad kane, u Bah Francis u la ong ba ka HYC ka la dawa na ka SMB ba ka dei ban shim khia mardor ban weng noh ïa katei ka jaka bret ñiut bad kumjuh ban pynkhuid noh ïa katei ka jaka, bad lada jia ba kam leh eiei, ka seng kan shim hi ïa ka lynti ban weng hi noh dalade ïa katei ka jaka bret ñiut.
