Nongstoiñ, Jymmang 06
Ka jinghap bad ther jong u phria, u slap bad ka lyer ha ki bynta jong ka West Khasi Hills District kaba la sdang naduh ka 5 tarik haduh ka 6 tarik u Jymmang, ka la wanrah ïa ka jingjulor bad shah ktah jong kiba bun ki ïing ki sem ha ki shnong ki thaw.
Katkum ba ïoh lum jingkheiñ na ka shlem treikam u Block Development Officer (BDO) ka Nongstoiñ C&RD Block la ong, ha ka 5 tarik u Jymmang 2024 ki don haduh 141 tylli ki ïing kiba la julor bad ha ka 6 tarik u Jymmang 2024 pat ki la don haduh 42 tylli ki shnong kiba la shah ktah bad kumba 200 tylli ki ïing ki la julor ha kane ka jinghap jong u phira ha ryngkat u slap bad ka lyer.
Nalor nangta la ong ruh ba ha ka Lah Sngi U Blei jong ka taïew, na ka liang ki bor ba dei khmih ka sorkar ki la ïoh ban ai jingïarap sha kumba 96 tylli ki longïing.
U Deputy Commissioner (DC) ka West Khasi Hills u Bah Garod LSN Dykes, IAS, u la ong ki shnong kiba la shah ktah na ka jingther jong u phria ha ka 6 tarik u Jymmang 2024 kiba hap ruh hapoh ka Nongstoiñ Block ki kynthup ïa ka shnong Mawkawah, Mawlangniang, Siejlieh, Pyndengrei, Mawngap, Urkali, Umsaw bad Mawkhan.
Shuh shuh u la ong ruh ba na ka liang ki bor district ki la ïoh ban ai ïa ki jingïarap ïa katto-katne bad ka jingpynpoi ïa ki lad jingïarap sha kiwei pat ki longïing kiba la shah ktah kan dang bteng.
