Ranchi, Jymmang 06
Ha ki 17 kynta, ki briew jong ka Enforcement Directorate (ED) ki la lah ban ñiew T. 35.23 klur kaba la ïoh kurup na ka ïing sah u nongtrei ïing jong u Personal Secretary (PS) u Myntri Sorkar ka jylla Jharkhand ha ka Lah Sngi U Blei. Ïa kane la pyntip lyngba ka lad pathai khubor, NDTV, na nongbah New Delhi.
Ka jingñiew ïa katei ka pisa kaba la bun ka la pynlong ruh ïa ki kor ñiew pisa ba kin sniew bad hap ban bujli da ki bathymmai.
Katei ka lad pathai khubor ka la ïathuh ba ka pisa kaba la ïoh kurup ka dei na ka ïing jong uwei u briew ba la tip kyrteng kum u Jahangir uba long u nongtrei ïing jong u Sanjiv Lal. U Sanjiv Lal u trei kum u Personal Secretary jong u Myntri ka tnat pynroi nongkyndong ka sorkar Jharkhand, u Alamgir Alam. U Alam u dei na ka seng Congress kaba long ka seng saiñpyrthei kaba ïatreilang ha ka sorkar synrop ha Jharkhand.
Ka ED ka la ïoh kurup ïa katei ka pisa ha ka por ba ka la pynlong ïa ka jingkhynra ha kumba hynriew tylli ki jaka kiba don jingïadei bad u Virendra Ram, Chief Engineer barim ka tnat pynroi nongkyndong ka jylla Jharkhand. U Ram u la shah kem mynshem snem halor ka jingkynnoh ba la don ka jingpyndonkam bakla pisa kaba don jingïadei bad ka jingbym ïaid beit ka rukom pyntreikam ïa ki skhim sorkar.
Lah ban kdew ba ka jingïoh kurup ïa katei ka pisa kaba bun ka la long katto-katne sngi shwa ba kan don ka ilekshon ha Jharkhand.
Na ka liang ka BJP ka la kdew halor ka jingdon jingïadei jong utei u Myntri Sorkar bad katei ka jingïoh kurup pisa, bad ka la kynnoh ïa ka liang pyrshah ba ka donkti ha ka kam bamsap bamngem.
U Myntri Rangbahduh, u Narendra Modi, uba la don ha Odisha ban ïalap ilekshon, u la ong, “Mynta ka sngi, la ïoh ban kurup bun bah ka pisa na Jharkhand. Hato ïathuh ïa nga, lada nga pynsangeh ïa ka jingtuh, jingkamai, jinglute jong ki, hato kin ym kren beiñ ïa u Modi? Wat la ki don ki jingkren beiñ, hato ngam dei ban trei ïa kane ka kam? Hato ngam dei ban ïada ïa ka pisa ka jong phi?” Kane ka jingkren jong u Modi ka long kumba kynthoh ïa ka liang pyrshah kaba kynnoh ba ka Sorkar Pdeng ka pyndonkam bakla ïa ki kynhun tohkit pyrshah ïa ki nongïalam kiba dei na ki seng saiñpyrthei ki bym don bad ka BJP.
U nongïalam ka BJP ha Jharkhand, u Babulal Marandi, u la ong ba lada katei ka dei ka jinglap pisa na ka ïing sah u nongtrei ha ka ïing u Personal Secretary u Myntri Sorkar, sa kaei pat yn lah ban lap na ka ïing sah u Myntri.
“Ki ju kynnoh ba ka ED ka pyndik ïa ki. Nga kwah ban ong ïa ka sorkar bad ïa ka Kalpana Soren ba dei ban weng noh ïa u Alamgir Alam kum u Myntri,” u la ong.
Na ka liang u Alamgir Alam u la ong ba katba ka ED kam pat dep ban tohkit, ym dei ban shu kynnoh kulmar. U la kdew kti ruh ïa u Sanjiv Lal uba la trei kum u Secretary jong ki arngut ki Myntri sorkar barim.
“U Sanjiv Lal u dei u nongtrei sorkar. U dei u Personal Secretary jong nga. U la long ruh u Personal Secretary jong ki arngut ki Myntri sorkar barim. Ngi ju thung ïa ki Personal Secretary katkum ka jingslem jong ki ha ka kam. Kam long kaba dei ban ai jingkynthoh halor ka jingkhynra ha shwa ba ka ED kan pyndep ïa ka jingtohkit,” la ong u Alam.
