Jowai, Jymmang 06
Hato ka don ka jingbakla ha ka rukom pynïaid ïa ka eksamin jong ka NEET UG da ki bor ba dei khmih jong ka St. Mary’s Mazzerello Girls Higher Secondary School, Jowai? Kane ka dei kawei na ki jaka ïaleh eksam NEET ha Jylla Meghalaya ka long ka jingkylli kaba la mih ha ka Lah Sngi U Blei mynta ka taïew.
Katei ka jingkylli ka la mih hadien ka jingleit tur jong 130 ngut ki samla kiba ngat centre ha St Mary’s Mazzerello Girls Higher Secondary School, Jowai ha ryngkat ka jingsynran lang ki kmie ki kpa sha katei ka skul ban pynpaw ïa ka jingbitar halor ka jingbakla ka rukom ai jingkylli ha ka eskamin NEET ha katei ka centre.
Ïa kane ka eksamin NEET (UG) 2024 la pynlong da ka National Testing Authority (NTA) ha ka 5 tarik Jymmang.
Haba ïakren bad ki samla pule ki la ïathuh ba ka rukom pynïaid ïa ka eksamin ha kane ka jaka kam long kaba beit kynthup naduh ka por sdang ïa ka eksam, ki la ong ba ha ka jingshisha ka por thoh ka dei 2.00 baje hynrei la sdang pat haduh 2.15 baje nohphai sngi bad kim shym la ai por tam ïa ki ban thoh.
Don ki samla kiba ju thoh teng ïa kane ka eksam bad kiba la sngewthuh bha ïa ka kyndon thoh jong kane ka eksam, ki la buh jingkylli ïa ki nongpynïaid Centre halor ka jingmih ar tylli ki Question ka QRST Series (rong stem) bad ka MNOP Series (rong saw) hynrei ki la kynnoh ba ki nongpynïaid kim sngap satia ïa ki.
Ki la ïathuh ruh ha kaba sdang jong ka eksam ki la sam da ka Paper QRST Series (rong stem) bad hadien 15 minit pat ki wan sam da ka MNOP Series (rong saw) bad nalor kata la don uwei uba dei ban thoh da ka kyntien Hindi hynrei u la ïoh 3 tylli ki Question Paper ha ka ktien English.
Kawei pat ka jingthurmur ka dei halor ki Admit Card, ki samla pule ki ïathuh ba ki la pynbor ïa ki nongpynïaid ban shim ïa ki admit card hynrei ki kyntait ban shim, hynrei ïa kane ruh ki samla ki hap ban wan submit ïa ka admit card haduh ka por mynmiet.
Na ka liang ka bor district jong ka West Jaiñtia Hills District lyngba ka ADC ka Kong DV Lyngdoh hadien ba ki la ïoh jingtip ïa ka jingleit tur jong ki samla pule mar mar ka la leit sha katei ka Centre bad na ka liang jong ka, ka la ai jingmut ïa ki samla ban ai da ka jingthoh halor ka jingshem jong ki. Kumta na ka liang ki samla ruh kiba ïakhun ïa kane ka eksam ki la ai da ka jingthoh sha u Controller ka NEET lyngba ka centre bad la phah kopi ruh sha Myntri ka Pule-Dangle ka Jylla, DC bad kiwei.
