Mawkyrwat, Jymmang 06
U Deputy Chief Executive Member ka KHADC uba dei peit ïa ka tnat Aiñ, u Bah Pynshngaiñ N Syiem ha ka 6 tarik Jymmang, 2024 u la hiar sha Mawkyrwat, South West Khasi Hills District ban jurip da lade ïa ka jingtreikam jong ka District Council Court kaba don ha Mawkyrwat da ka jingthmu ban pynbha shuh shuh ïa ka rukom treikam hapoh kane ka shlem.
Haba kren bad ki lad pathai khubor hadien ka jingïakynduh bad ki ophisar ka KHADC Mawkyrwat, u Bah PN Syiem u la ïathuh ba ka jingthmu jong ka jingwan jurip ïa kane shnat treikam, ka long kum shi bynta ban pynsuk ïa ki paidbah ha kaba ïadei bad ki kam Mukotduma (Case) jong ka District Council ban pynbiang shuh shuh naduh ki nongtrei, ki kamra na ka bynta ki Magistrate bad na ka bynta ki nongïasaid aiñ.
U la ïathuh ruh ba ha kaba ïadei bad ka CrPC, ka KHADC kan sa ïakren bad ka sorkar ba la kumno-kumno ïa ki mukotduma hapdeng ki riewlum (tribal) dei ban phah beit da ka District Council Court bad dei na kata ka daw ba ka Council ka la i donkam ban pynkhlaiñ ïa ki Court ha man la ki district headquarter.
Shuh shuh ha kaba ïadei bad jaka jong ka KHADC ha Mawkyrwat kaba shongdor 33 lak tyngka ka bym pat lah ban siew pyndep ha kaba u trai jaka u Bah Nolipstar Lyngdoh haduh mynta u dang ïoh pdiang tang 10 lak tyngka, u Bah Syiem u la ong ba um pat lah ban ong eiei halor kane hynrei un hap ban peit bniah shwa ïa ki kot ki sla.
