Jowai, Jymmang:
Ka tnad pule Physics jong ka Kiang Nangbah Govt. College (KNGC), Jowai ha ka 3 tarik Jymmang ka la pynlong ïa ka ‘Enrichment Programme’ ha ka dur jong ka ‘Practical Demonstration’ ha Physics Laboratory.
Ka jingthmu jong kane ka prokram ka long ban ïarap ïa ki khynnah ban sngewthuh bha shaphang ki ‘Experiment’ jong ka sobjek Physics bad ruh ban ai jingtip ïa ki khynnah klas X ha kaba ïadei bad ka jinglap ne ‘Experiment’ khnang ban khring ïa ki ba kin sngewtynnad ban pule ïa ka sobjek Physics.
Ha kane ka prokram la shim bynta da ka khynnah klas-X na ki 5 tylli ki skul kiba don hapoh ka sor Jowai kynthup ka Marian Hills Higher Secondary School, Jowai, St. Mary Mazzarello Girls Higher Secondary, Jowai, K.J.P. Synod Mihngi Higher Secondary School, Jowai, Govt. Boys Higher Secondary School, Jowai bad Govt. Girls Higher Secondary School, Jowai.
Ha kane ka prokram, ki samla pule B.Sc 4th & 6th Semester (Physics Honours), ki la batai ïa ka jingshem jinglap (Experiment) jong ki ha ka sobjek Physics sha kitei ki khynnah skul.
La sdang ïa ka prokram da ka jingïalang ba la pynïaid da u Dr. D. Suchiang, Assistant Prof., bad la ïoh ki kyntien pdiang burom na u Bah T. Bamon, Head Of Deaprtment, ka jingkren lyngkot na u Bah R. Nanghuloo, Assistant Prof. bad haba kut la ïoh ka jingkren khublei na ka Kong H. Passah, Senior Lecturer.
Hadien ka jingïalang, ki khynnah klas X ki la ïoh lad ban sngap bad shah skhor ïa ki jingbatai na ki samla pule B.Sc 4th bad 6th Semester (Physics Honours) ïa ki jinglap ne ‘Experiment’ bapher-bapher.
