Imphal, Jymmang:
Namar ka jingjur palat jong u slap, baroh ki jaka pule ha Manipur ki la khang khyrdep lut hynnin ka sngi bad ka ban bteng mynta ka sngi ruh, la ong u Myntri Rangbah ka jylla u N Biren Singh.
“Baroh ki skul bad ki kolej ki la khang ha ka 6 tarik, bad mynta ka 7 tarik, Jymmang, 2024 namar ka jingbteng jong ka jingpynthut u slap ha ka jylla. Ïa kane ka rai la shim kum shi bynta ban ai ki jingïada bad ban pyllait na kino kino ki jingjia basngewsih na kane ka jingbteng jong ka jingthut ka suiñ bneng,” la ong u Myntri Rangbah ha ka jingphah khubor lyngba ka rynsan X.
“Nga buh ka jingkyrpad sha baroh ki nongshong shnong ba ki la dei ban long kiba husiar bad ba lada ka long kaba lah kin ym mih shabar ne leit jingleit. Ka sorkar ka la shim ïa baroh ki sienjam kiba donkam eh ha kaba ïadei bad ki lad jingïada ïa ka jingim jong ki briew bad ban ai jingïarap sha kito kiba shah ktah na ki jingthombor ki bor ka mariang,” u la bynrap.
Ka jingjur jong u slap uba la wan lang ha ryngkat u phria ha ki bynta ba bun jong ka Manipur ha ka sngi U Blei ka la pynjulor ïa kiba bun ki ïing bad ki kali, la ïathuh ki heh ba dei khmih.
Ka jinghap jong u phria kaba jur ka la ktah ïa kiba bun ki bynta jong ka Manipur ha ka sngi U Blei, ha kaba kane ka la pynjulor ïa kiba bun ki ïing, ki kali bad ki jingthung jingtep. U Myntri Rangbah u la kular ban shna pynbha bad phah maramot ïa kine ki ïing kiba la julor.
