Jerusalem, Jymmang:
Ka tnat shipai jong ka Israel ha ka Sngi U Blei ka la iathuh ba ki ‘namding jong ki lehnoh Hamas ki la leit poi sha ka thaiñ Kerem Shalom kaba don mar syndah bad ka Gaza Strip, ha kaba 3 ngut ki shipai ka Israel ki la kyllon iap ha katei ka jingjia bad kumba katto-katne ngut pat kiba ngat bad mynsaw.
Shuh shuh ruh la iathuh ba 3 ngut napdeng jong ki 12 ngut kiba mynsaw ha katei ka sngi, ki dei kiba la don hapdeng ka jingma kaba khraw kaba ap ia ka jingim jong ki namar ka jingbthei jong kitei ki bom lane ki ‘namding ba la ther da ki lehnoh Hamas ha katei ka jingjia.
Kumjuh ruh na ka liang jong ka kynhun lehnoh Hamas, ki la pynbna bad kam halor katei ka jingjia bad ong ba ki dkhot ka Hamas ki la ioh ban ther bom sha Israel bad kaba la pynlong ia ki bor pyniaid ka Israel ba kin hap ban khang noh ia ka jingrung- jingmih na utei u khappud jong ka Gaza bad Israel hadien jong katei ka jingjia. Namarkata, la ong ba baroh ki lad jingiarap kiba dei ban poi sha Gaza na ki tnat bapher jong ka pyrthei, ki la hap ban pynsangeh noh namar ba katei ka bynta khappud kam long shuh ban dang iaid ne treikam kumba ju long barabor.
Ki shipai Israel ki la iathuh ba ha katei ka sngi, la iohi ia 14 tylli ki ‘namding ba la ther da ki lehnoh Hamas na shiliang khappud bad ka Israel.
Ha kajuh ka por, ki shipai ka Israel ruh khlem da pynslem ki la pynphai kylliang bad ther ia ki ‘namding na katei ka thaiñ sha katei ka bynta ba kitei ki ‘namding jong ka Hamas ki wan poi.
Kumta, na ka liang ka tnat iada jong ka Israel ka la pynksan ba katei ka jingleh jong ki lehnoh Hamas ka long ka bym lah pdiang bad ka long ruh kaba eh ia ka Israel ba kan map ne ban bteng ia ki jingiakren ïasuk lada ka Hamas ka leh ha katei ka rukom.
Namar la ong ba ka Israel bad ki heh ka Hamas, ki la pynbeit ban iakren naka bynta ka jingsangeh thma kumba 40 sngi eiei, khnang ba yn ioh ban pyndep ia ki kam ba sah baroh bad khamtam eh ban pynpoi ia ki lad jingiarap bad ki jingdonkam ba kongsan sha ki paidbah nongshong shnong ka Gaza kiba la shu shong tyrkhong bad im satar khlem ka bam- ka dih bad khlem ki dawai- ki dashin naduh ba sdang ka thma ha u snem ba la leit tad haduh une u Iaiong jong une u snem 2024 ba ka Hamas ka la kular ban ailad lada ka Israel ka mynjur.
