Ranchi, Jymmang:
Ka kynhun Enforcement Directorate (ED) hynnin ka sngi ka la pynlong ïa kiba bun ki jing-leit khynra ha kylleng ki jaka kiba don ha ka nongbah Ranchi jong ka Jharkhand ha kaba kane ka la pynlong ban ïoh kurup ïa T. 25 klur ka pisa kaba khlem don jingkheiñ. Ïa kine ki jingleit khynra ba dang shen, la pynlong hapoh ka jingtreikam jong ka Prevention of Money Laundering Act (PMLA), ha kaba la lah ban khynra sha kumba 12 tylli eiei ki jaka kiba don jingïadei bad u Virendra Ram, uba long u Chief Engineer barim ha ka Jharkhand Rural Development Department, bad ha ki jaka sah bad treikam jong u.
U Virendra Ram u la shahkem ha ka kynhun ED ha u Rymphang jong u snem 2023 ha kaba ïadei bad ka jingshah kynnoh donkti ha ka jingjia ba kamai beaiñ ïa ka spah.
Kumba la sakhi ha ki durkhih ba la ïoh ring, la lah ban ïohi ïa shi lumthup ki lut tyngka kiba la saphriang ha ka kamra jong u nongtrei ïing jong u Sanjiv Lal, uba long u Personal Secretary jong u Myntri ba dei khmih halor ki kam pynroi jong ki thaiñ nongkyndong ha Jharkhand u Alamgir Alam.
“Ka kam bamsap kam pat kut ha Jharkhand. Kane ka pisa kumba la lap ha ka por ilekshon ka long halor ka jingthmu ban pyndonkam ïa ka ha ki kam ilekshon. Ka Election Commission ka la dei ban leh ei ei halor kane,” la ong u nongaiktien jong ka seng BJP ha Jharkhand u Pratul Shahdev.
Ka kynhun tohkit ka la pynlong ïa kiba bun ki jingleit khynra ha 9 tylli ki jaka, kynthup ha Sail City ha Ranchi.
Hynnin ka step, kawei na ki kynhun jong ka kynhun ED ka la leit sha Sail City na ka bynta ban wad bad lap ïa u Vikas Kumar, uba long u Engineer na ka Road Construction Department.
Sa kawei pat ka kynhun jong ka kynhun ED ka la pynlong ïa ki jingleit khynra ha Bariatu, Morhabadi, bad ha ki thaiñ Bodia.
