Shillong, Jymmang 06
U Myntri Rangbah ka Jylla, u Conrad K. Sangma ha ka Lah Sngi U Blei u la bthah ïa ki bor distrik ban pynbiang ïa ki lad jingïarap ba mardor sha ki longïing kiba shah ktah na ki jinglynshop mariang kiba la jia ha kylleng ka Jylla ha ka Sngi U Blei.
“Hynnin ka sngi namar ka ‘erïong bad ka jinghap slap ba jur ha ki katto-katne ki bynta jong ka Jylla, ki la don bun tylli ki ïing kiba la julor ha ki distrik bapher-bapher. Kumba 7 tylli ki distrik ki la shah ktah bad palat 400 tylli ki ïing ki la julor,” la ong u Sangma.
Ha kajuh ka por, u la ong ba u la bthah mardor ïa ki bor pynïaid distrik bad ki tnat treikam ba dei khmih ban pynbiang lad jingïarap sha kito ki longïing kiba shah ktah bad kumba ka long mynta, ka kam ka la ïaid shakhmat.
Haba kdew ba ki longïing kiba la julor na ka jinglynshop mariang ki la ïoh pdiang ïa ki lad jingïarap bapher-bapher ba kynthup ïa ki tin sop ïing (CGI), u Sangma u la ong ba hashuwa, lada wan kiba kum kine ki jinglynshop mariang, ki kyndon ki shah ban sam tang ïa u khaw lem bad kiwei-kiwei ki mar bam ha ki kam kiba donkam kyrkieh hynrei ym shym la kynthup lang ïa ki tiar ïing.
“Hynrei ngi la wanrah jingkylla ha ki kyndon ha kine ki khyndiat snem ba la dep bad mynta, ki Deputy Commissioner (DC) ha ka kyrdan jong ki, khlem da donkam shim ïa kano-kano ka jingmynjur na ki bor ba dei khmih ka Jylla ki lah ban lum jingkheiñ bad sam ïa ki tin sop ïing ha ki distrik katkum ka jingkhmih bniah jong ki,” ong u Myntri Rangbah.
Shuh shuh u la bynrap ba kane ha kawei ka liang ka la pynïaid beit pynïaid ryntih ïa ki kam ki jam bad kumba ka long, ka kam ba ïadei bad ki kam shna ïing kaba dei ban shim por mynshuwa kumba 6 bnai bad wat shi snem, ha shuwa ban ïoh sam ïa ki tin sop ïing, mynta hadien ba la wanrah jingkylla ha ki kyndon, ki DC ki la ïaid shakhmat bad leh ïa kaba donkam.
“Mynta ka sngi ruh kiba bun ki longïing ki la ïoh pdiang ïa ki lad jingïarap ba kynthup ïa ki tin sop ïing bad kito ki bym pat ïoh, kin sa ïoh pdiang ïa ki hapoh kine ki 24 ne 48 kynta,” la ong u Sangma.
Kum ban shu kdew hangne, ka kaiphod na ka Meghalaya State Disaster Management Authority (MSDMA) ka ïathuh ba 949 ngut ki nongshong shnong ha ki 7 tylli distrik ba kynthup ïa ka East Khasi Hills, West Khasi Hills, Eastern West Khasi Hills, West Jaiñtia Hills, East Jaiñtia Hills, South Garo Hills bad South West Khasi Hills ki la shah ktah na ka jinglynshop mariang ha ka Sngi U Blei.
Nalor kine, ki don ruh 29 tylli ki shnong ha kine ki 7 distrik kiba la shah ktah bad 483 tylli ki ïing kiba la julor na ka jingkhyrwit ka ‘erïong bad ka jingther u lapbah ha ryngkat u phria ha ka 5 tarik mynta u bnai.
