Shillong, Jymmang 06
Ka KSU Rangshken Unit ka la pynhap pyrda noh ïa ka lympung ïalehkai T20 1st Maitshaphrang Khasi Knockout Cricket Tournament ba la pynlong ha Madan Kseh Bilat, Rangshken ha kaba ka Rangshken Cricket Club ka la long ka lahduh.
Kane ka jinglah ban pynthikna ka la wan hadien ba ka la lah ban pynliem noh ïa ka Shaphrang Cricket Club (Mawphlang) ha ka jingïakhun final kaba ka long ha ka sngi Saitjaiñ. Ka Rangshken kaba la tied shwa nyngkong ka la lah ban kamai 129 run. Haba beh ïa kane ka thong, ki nongtied ka Shaphrang CC ki la lah ban tied tang 72 run bad shah pynhap wiket baroh ki nongtied. Ïa ka nam ‘Man of the Match’ bad ïa ka nam ‘Most Wicket Taker’ la ïoh rah da u Sarjoneskn Kharphuli na ka Rangshken CC bad ïa ka nam ‘Best Catch Taker’ la ïoh rah da u Gary Dkhar na ka Kynhun Shiparlok.
Lyngba kane ka nam jop ka Rangshken Area CC ka la ïoh pdiang ïa ka song pisa T. 10,000 lem bad ka trophy, katba ka Shaphrang CC ka la ïoh T.5,000 ryngkat ka trophy.
Ha kane ka sngi la ïa don ryngkat da u Samla Pynshaiborlang Rani, uba long u Information and Publicity Secretary ka KSU Sengkmie kum kongsan bad u samla Nathanial Rymmai kum u symbud kongsan ha ryngkat ki nongïalam ka KSU Rangshken Unit u samla Nestarjune Matbaniang, General Secretary, Bah Marchkupar Thabah, President KSU Sohiong Circle, u Emosjohn Syiemlieh President Nongspung Circle bad ki rangbah shnong, secretary shnong jong ka shnong Rangshken.
